美國NBA明星賽喺香港時間噚日朝早喺洛杉磯開波，成班荷李活明星都有嚟睇波，而名媛ParisHilton同佢男友NickCarter亦有到場晒煙韌！不過全晚焦點除咗班打到甩髀嘅球星之外，因為露乳事件而搞出個大頭佛嘅珍納積遜（JanetJackson）肯定係記者第二最愛。
珍納自從單露乳事件之後就刻意收埋自己，噚日佢戴住副太陽眼鏡，重着到密密實實咁同男友一齊睇波，不過啲記者又點肯放過佢吖，梗係爭崩頭影佢啦！相比之下，喺賽前負責唱美國國歌嘅Christina同埋中場表演嘅Beyonce風頭真係唔及珍納喇！
不過咁，上次珍納露乳兩秒就上足兩個禮拜報紙頭條，Beyonce噚日一樣唔畀珍納專美，佢着住一條超薄halterneck裙起勢咁跳，其間重差啲走光，睇嚟上次喺超級碗度俾人搶晒風頭嘅Beyonce，真係學到啲嘢。反而Christina一身causallook，一睇就知佢輸晒啦！
而早前贏咗三個格林美獎嘅OutKast，見珍納咁難得公開出嚟見吓人，重唔乘機賀吓佢咩，喺表演期間又𢱑開件衫，擺明又係潤珍納啫！