港股噚日造好，突破13800關口，高見13857，創32個月新高，但高位有獲利回吐，恒指最後收報13831，升91點，成交212億元。
市場好似唔係太驚公司配股供股抽水，新世界（017）以37.9%大折讓價供股，全世界都預咗佢會大幅下滑，點知全日只跌2.9%；安德利果汁（8259）打開口牌話準備配股，噚日復牌股價不跌反升，全日收報1.05元，升14.1%，成交達2191萬元。思捷環球（330）股東減持，抽水5.76億元，但股價噚日上升3.6%，東方海外（316）配股抽水約12億元後，股價只微跌0.73%。
黑客話，早前大市調整時，包銷商相當審慎，如無十足把握，根本不會亂咁包銷，所以如今可以落實配股的股份，佢哋嘅包銷商全部都係實力派，通常只安排少數基金接貨，並且設有禁售期，好似東方海外批舊股，據講要被凍結3個月至可以沽貨，意味承配人絕非泛泛之輩，更非短線投機客。況且，阿董家族好大機會增持東方海外至接近75%。
至於安德利果汁，則明刀明槍，炒上後至定價配股，據聞配售股份已搵齊人認頭，只等股東會通過及中國證監批准。
魚缸中二三線股炒風大作，而且成交唔弱，其中完成配售4800萬元可換股債券嘅軟庫發展（648）勁升22.8%，收0.151元，成交達1.54億元；賣樓成績理想嘅富豪酒店（078）炒高11%至0.27元，成交達1.73億元；中建電訊（138）更大升16.5%至1.76元，成交5836萬元。藍籌同國企玩咗咁耐，𠵱家輪都輪到二三線股。
阿虎