經紀黃上次推介安德利果汁（8259），話公司將有搞作，唔排除係配股。點知講完冇耐，公司果真停牌表示計劃配股。經紀黃話，批股只係其中一項活動，終極目標係搞埋上主板。
安德利噚日復牌大發神威，最高見1.07元，收1.05元，大升14.1％，成交2191萬元，絕對唔係乾升格局，相比經紀黃上周推介時唔夠0.90元，股價升近兩成。
正如其他創業板H股元征科技（8196）同寶德科技（8236）等，安德利唔係話批股就批股，需要國家批准同埋股東會通過，睇嚟要搞好一段時間，根據過往經驗，股價喺呢段時間內，應該會守得住，偶然重會有驚喜。
上周有間好活躍嘅外資大行為安德利出報告，話睇1元樓上，故此經紀黃話唔擔心隻股在急升後，出現太大獲利回吐。
另外，早前提過話有配股傳聞的筆克遠東（752），今日公布全年業績，股價噚日已見異動，上升7.8%，收0.485元。
慕容小初