記得多年前健力寶曾經派過唔少年輕足球員到巴西學法，以提升中國球員嘅球技。估唔到風水輪流轉，由遼寧、巴西及加拿大投資公司所組成一支名為遼寧聖保羅嘅球隊，一行二十二名巴西年輕球員已經到咗中國；球隊嘅總經理重話，會安排呢支球隊先踢中國甲B，希望三至五年內可以將呢班球員轉晒中國籍，然後打中超聯，咁都得？
球隊話咁做係希望提升中國聯賽同埋國家隊嘅水準；但我求大俠就覺得咁樣始終影響咗中國土生土長球員嘅機會，而且，如果真係咁容易就可以轉國籍，咁容乜易第時隊中國國家隊變咗聯合國兵團？不過，現代足球始終係商業掛帥，而且遼寧聖保羅隊咁做似噱頭嘢多啲，大家都係放長雙眼睇吓點。
今季歐洲球壇有兩大衰波，成日搞到捧場球迷損手爛腳，一隊係西甲聯嘅巴塞隆拿，另一隊就係英超聯嘅利物浦。喺巴塞已經漸有反彈演出，帶挈捧場客嘅時候，紅軍「依然故我」，星期日嘅足總盃主場對老樸時，開波兩分鐘已領先，最後都被迫和，真係睇到我求大俠嘔血。
蘇超聯球隊些路迪𠵱家喺榜首領先次席嘅流浪十三分，唔少博彩公司都考慮派咗彩算數；但佢哋最擔心嘅係阿仙奴同埋侯城攞埋今屆英超聯同埋英丙聯嘅冠軍，因為呢三隊同時奪得聯賽冠軍嘅賠率係二十九倍，到時就會賠到喊。所以博彩公司打算幫阿仙奴同埋侯城嘅對家發功咁話喎！
眾意甲強隊歇冬後征戰頻密，前晚終整個全下盤宴大家歎吓。淨係睇AC作客萊切，AC班疲兵俾萊切一對快馬放幾輪，而加度素變白頭嚤囉、血流披面，睇見都辛苦。值得一提係萊切保加利亞前鋒保真諾夫當日得到最佳十八歲生日禮物，就係佢偶像史杜捷高夫入場捧佢場。
法甲嘅歐塞爾前鋒施斯話利物浦係間好好嘅跳板球會，只要去咗嗰度，下一步就好可能會跳到一啲超級球會。我求大俠心諗，施斯咁講嘢冇乜腦，因為咁已經得罪咗紅軍，搞到人哋冇晒面，唔要你係天經地義。話時話，利物浦連弱隊老樸都贏唔到，又真係唔怪得施斯發噏風嘅。