居屋紅磡紅灣半島轉作私樓出售事件，議員評為「賤賣」，房屋及規劃地政局局長孫明揚同發展商，都列舉大堆數字證明自己合理。實情呢？
政府其實只收到兩筆錢，一係標價，五億八千三百萬，另一筆係補地價，八億六千四百萬。合共十四億四千七百萬，每呎九百零蚊，就賣斷畀發展商，你話，咁樣算唔算「賤賣」呢？
雖然政府話補價講唔掂數，要賠逾十九億畀發展商，但呢個金額，其實係政府預先承諾，向發展商回購居屋住宅部份嘅價錢。換句話講，畀咗錢，就擁有二千幾個住宅嘅業權。
假如政府交畀房委會以居屋出售，點都會有賺。若賣二千一蚊呎，一來一回，政府最少唔見咗近五億。
其實發展商果真係迫到政府要回購住宅部份，啲住宅要繼續丟空，對佢持有嘅商場同停車場都好冇好處。但今次爭取到低價補地，然後重繼續打官司索償，賠幾多尚未知，雖然政府向立法會話賠款應遠低於八億六筆數，但成件事，令蘭西諗起四個字——割地賠款。
近排樓市旺，豪宅重熾熱，唔少買家追捧新貨。
好似市場矚目嘅九龍豪宅新盤尖沙嘴君臨天下，上個禮拜搞完藝術展，邀請到唔少城中富豪同埋有潛質買家去參觀。
當晚，發展商派發首度曝光嘅售樓書，包裝幾精美，用色好清淡（圖三）。
恒隆地產發言人話，售樓書嘅封面，用咗非一般嘅紙張，同其他樓書唔同，係幾經挑選後至揀出嚟。上個禮拜派咗至少一百本，遲啲會派畀公眾。
講得上係豪宅，用料自然講究。呢個盤就有幾款唔同用料系列畀買家揀。例如全屋地板可以揀櫸木或紅檀木。浴室門可以選擇用黑鐵木、麥哥利影木或洋松木。所有廚房裝有電視。
複式同四房雙套房單位，全屋裝有音響系統；複式重有紅酒櫃。浴室裏面就設埋桑拿房。淨係咁睇，用料夠哂瞄頭（表）。
樓市氣勢如虹，地產代理行收入，屢創新高。
利嘉閣今個月上半月，已經做到三千五百萬數，等於上個月嘅七成三，照走勢睇，今個月肯定又可以破紀錄。
利記啲分行，有九間佣金逾百萬。其中四間，更多過二百萬，分別係何文田、又一邨、赤柱同禮頓山B組。
據講，何文田分行差些少就有三百萬，相信主要來自熱賣中嘅新盤君頤峰，咁全月就過硬呢個數。
另外，睇番中原地產嘅網頁，今個月上半月，本港住宅部嘅佣金，係七千四百七十六萬，比上月同期多八個巴仙。
中原高級分行經理盧文偉話，西半山豫園（圖四），啱啱有一宗高價成交，係一座高層B室，九二九方呎，以四百七十八萬成交，每呎高達五一四五。
點知銀行估價只得四百二十萬，比成交價低一成二。即係買家要攞多五十八萬出嚟，先至上到會。
盧文偉指出，其實上個月，豫園都有個一座低層冇海景單位易手，銀行估價更離譜，比成交價低一成六。呢啲情況，原來喺西半山好普遍，所以買家一般都已經預埋筆錢。
品質國際主席李同樂，月初以一億三千八百萬，將山頂道一號豪宅，賣畀渝港國際兼渝太地產主席張松橋。
究竟邊嗰經紀促成單deal呢？百幾萬佣喎。
蘭西收到可靠消息話，今次冇一家代理行得益，事關單嘢係由華人置業大股東劉鑾雄（大劉）促成。
據講，李同樂原本計劃賣畀一名投資者，但對方話要考慮一晚，第日至覆。咁啱嗰晚大劉同張松橋食飯，知道老友想買，即刻答應充當紅娘。結果係點，大家都知嘞。
蘭西知道，能夠促成呢單「鵰」，大劉重好開心㖭！
蘭西
電郵地址：
