恒指又創今個牛市新高，收報13831，好快會試萬四關。中銀（2388）繼續強勢，升4格，收報15.8元，昨日推介中銀Call輪9218，收報23.4仙，進帳0.5仙，升幅跟唔貼正股，數據變得更靚，遲早追番上嚟。
兩大銀行股滙豐（005）同恒生（011）處於回氣階段，是日表現一般，滙豐進帳5毫，現價126.5元，恒生回順至109元，跌5毫。滙恒唔夠兩個禮拜就派成績表，斷估應該幾靚，股價短期易升難跌，佢哋嘅Call輪要昅實。
滙豐Call輪當中，9274數據不俗，現價97仙，玩到5月11日，溢價不足1%，槓桿率有13倍。
想刀仔鋸大樹而又受得起刺激者，可以考慮9305，現價24.5仙，6月1日屆滿，溢價8.7%，槓桿率51.6%極之爆炸，正股喺業績公布前起5元，9305有權升9成；當然，潛在回報高，亦意味潛在風險大。
恒生Call輪9162數據幾靚，現價79仙，負溢價1%，槓桿率達13.8倍，缺點係尚餘日子唔係太多，4月19日玩完。另1件9247亦可考慮，溢價5.2%，槓桿率23.4倍，玩到7月26日，呢件行使價110元，正股升一兩蚊，隻輪立即變價內，到時會幾好炒。
章盛