C博士精研中國經濟，與國內研究人員聯絡不斷，對國情嘅認識，百倍於左丁山。佢話胡錦濤訪問法國時期，上任主席南巡、上任總理到廣州避寒、上任人大委員會主席暢遊廣東，都唔知幾生猛。退休幹部「不約而同」地到南方宣揚，你估係為胡溫做啦啦隊咩！C博士話胡溫二人從基層幹部做起，夠踏實紮實，累積民望，沉住氣推行新政，對香港問題唔會太有時間兼顧。只係特區領導人唔爭氣，成為包袱，於是寧左勿右嘅老習慣又出番嚟，香港人「爭不逢時」，只有嘆句冇運。
聽完C博士之言，醒起上任國師葉國華喺新出版嘅《港人月刊》有一篇鴻文，態度十分開放，但冇睇過，只見過《經濟日報》邱成武介紹過。於是立即落樓去報攤買《港人月刊》，攤主見左丁山買咗幾份馬經先至問有冇《港人月刊》，知道左丁山唔係混吉，細細聲講：「冇晒嘞，唔係好賣噃，而係出版後第二日，我一本都未賣過，發行就走嚟收書，收清光，唔再賣。點解今日出書，聽日收書呢？發行都唔肯講，只話奉上頭命令行事。」
又會咁嘅，《港人月刊》係霍英東老友何銘思出版嘅，好有來頭噃，點解一月創刊唔賣，二月號至今未見到？邊位讀者知道詳情，請通知。聽李鵬飛節目，葉國華係嘉賓，佢嘅說話甚為開通開明，唔似係陶傑筆下嘅土共，會唔會係佢篇文章累親人呀？