文豪魯迅嘅獨子周海嬰，噚日應浸大邀請由北京嚟香港，出席「魯迅節」嘅開幕典禮，年屆七十四嘅周海嬰同父親魯迅生得成個餅印咁，可能佢曾經喺廣播電影電視部任職，假假哋都係個京官，所以對記者嘅提問都可以四両撥千斤咁擋去，記者都好難從佢把口挖到乜嘢堅料。
住喺北京嘅周海嬰，原來都識得講廣東話，重做咗同佢一齊嚟嘅北京魯迅博物館副館長孫郁嘅繙譯㖭。原來周海嬰喺一九四六年喺香港嘅培僑中學讀過一年嘅高一，佢話因為當時國民黨想挾持佢做人質，喺地下黨（即共產黨）嘅保護之下嚟到香港讀書。
周海嬰上次嚟香港，啱啱係《蘋果》創刊之時，即係一九九五年，佢話當時都有買《蘋果》嚟睇，所以都算係《蘋果》讀者喎。佢講得啱，《蘋果》嫉惡如仇，性格同魯迅一樣，魯迅若果在生，一定會係《蘋果》擁躉㖭。
（圖）周海嬰同太太一齊嚟香港，出席「魯迅節」。
傳真︰2623-9278
電郵︰