無綫新紮小生、有份演出《衝上雲霄》嘅黃宗澤，自從同落選港姐王從希合作過一個遊戲節目後，王從希就不時公開話對黃宗澤好有好感，又話對方符合晒佢嘅擇偶條件，好想做好朋友咁話。女仔都主動開到聲，黃宗澤又點呢？前晚佢同吳卓羲、唐思詠，重有同蘇永康傳緋聞嘅Monique去銅鑼灣時代廣場出席一個派對，黃宗澤竟然公開婉拒王從希嘅好意，正式係神女有心，襄王無夢呀。
黃宗澤一提到王從希，就好尷尬咁話：「我未試過同佢單獨出街㗎，大家係朋友咋。」提到王從希對佢好有好感，黃宗澤就話：「係佢諗法啫，有冇發展就隨緣啦，咁問好尷尬呀，我哋只係合作過一次咋。」有記者好嚴肅咁問黃宗澤對王從希有冇意思，佢竟然話：「事業為重啦。」咁大家明啦！
至於同蘇永康傳緋聞嘅Monique，佢自從呢單嘢之後，就多咗好多騷接，緋聞都算幫咗佢，佢話自己同康仔識咗八年，係傾心事嘅朋友，佢對康仔情況好清楚，Monique話：「佢同前妻冇聯絡啦，兩個都改咗電話號碼啦。」提到康仔有好多緋聞，Monique話：「佢啱啱結婚時都好定性，不過男人都係花心，鍾意用眼去戀愛，所以易惹緋聞。」Monique重話同康仔一日通一次電話，話佢兩個冇嘢真係搵鬼信喇！
章小蕙早排情人節又俾傳媒影到拖住法國男伴四圍蒲，去養和醫院、上山頂跳舞，情到濃時又拖手又錫額頭。中途重叫咗新歡返屋企同阿女嘉湄玩㖭，章小蕙身邊男伴車輪咁轉，唔知嘉湄認唔認得晒咁多叔叔呢？章小蕙噚日就話：「佢只係我約會中嘅其中一位男士，不過唔好講咁多，因為佢有工作㗎，費事影響佢啦！」
韓國變性歌手河利秀噚日去咗台灣出席電視節目，而近日成為台灣話題女王嘅許純美預計都會出席節目。本來佢兩個一齊出現，肯定夠晒噱頭，但唔知係唔係驚會俾人攞嚟同許純美比較，河利秀嘅經理人事先就話明佢兩個一定冇同台出現嘅機會喎！
電影《頭文字D》一波幾折，繼導演由徐克換上《無間道》班底嘅麥兆輝同劉偉強後，男主角周杰倫又唔知拍唔拍得成。因為套戲四月開，周杰倫要做唱片撞期，林建岳呢幾日喺台灣已經好努力咁同周杰倫公司度緊期，亦好有誠意咁幫周杰倫安排咗賽車課程，可以去日本學，再唔係請老師去台灣教都得。
黃夏蕙又有新搞作，佢噚日叫齊各大報館記者去柴灣警署話要報案。原來早前有個女人報警話俾人打電話嚟騙財，而個電話號碼係夏蕙姨嘅。夏蕙姨就聲稱佢個電話號碼俾人盜用咗四次，另一個號碼又俾人勾線。夏蕙姨話今次去警署係要去解釋件事同攞番啲嘢，不過佢就掉轉頭講，話要嚟聽警察解釋喎！
蕭正楠憑《六樓后座》獲今屆金像獎「最佳新演員獎」嘅提名，點知日前有指佢參演過《監獄風雲之少年犯》，冇資格角逐新人獎咁話，噚日香港電影金像獎協會就發聲明，話經過佢哋董事局暨評選事務組重新睇過部電影，認為蕭正楠喺《監》片嘅戲份同候選資格冇牴觸，所以維持佢嘅提名資格。蕭正楠噚日話：「我覺得好似失而復得咁。」
