如果大家有留意開車壇動態的話，都會知道德國平治車廠將於下月初舉行嘅瑞士日內瓦車展上，展出新一代SLK開篷跑車；但歐洲方面日前就傳來消息，指新款SLK喺未正式推出前，經已成為全球車迷所注視嘅新車之一呢！講番部車，屬第二代嘅新款平治SLK，賣相與早前曾惹來車迷注視嘅SLRMcLaren跑車相近，尤其係車頭部份就最能將呢個特點展露出來，襯以圓潤而流暢嘅車身線條，望落既吸引又突出，而且重帶點同廠CLK轎跑車，所予人嗰份年輕活力感㖭！
至於車廂方面，經廠方精心設計後，絕能顯現出一份活力感，不但空間來得寬敞闊落，加上承托力甚豐嘅座椅，以及齊全設備配搭，乘坐倍覺舒適愜意；除此之外，用家更可選配於開啟篷頂後，座椅頭枕能透出柔柔暖風嘅Airscarf系統㖭！廠方又為新車提供有多台引擎選擇，當中包括全新SLK350所配用嘅一台3.5公升V6偈（馬力272匹，扭力35.7kgm），同埋SLK55AMG所採用嘅一台5.5公升V8偈（馬力360匹，扭力52.0kgm）等等，另後者更附有7G-Tronic7前速半自動波箱，性能表現毋庸置疑。有興趣嘅車迷，就要密切留意新車在港嘅推出日期喇！
