做娛樂圈嘅女星，紅咗之後就零舍容易寂寞，名人界亦一樣，女人太叻，就好難搵另一半，高不成低不就，最後就落得孑然一身。不過𠵱家年代唔同，男人可以主動去媾女解悶，女人一樣得。
好似名媛咁，之前婚姻失敗，跟住就只係拍吓散拖，一直搵唔到理想對象，名媛生得四正，又有名氣，條件咁好，但係就硬係冇男人敢吼，經過咁多年，名媛都化晒，得閒就去夜店蒲吓，搞一夜情又好，齋傾飲酒又好，總之搵個人陪吓自己慰藉吓，好過一個人喺屋企坐。
初時啲男人見到名媛，都唔敢出擊，驚高攀唔起，後來知道佢冇乜所謂，只係求開心，先至夠膽埋去搭吓嗲，𠵱家出面嗰啲玩家，全部都知道女名媛好易上手，亦知名媛好理智，玩完唔會上身，咁重唔湧住去咩！
台灣女藝人天心噚日着住件由五百張迷你信用卡組成嘅小禮服，出席銀行活動，佢重話，當設計師將一大箱信用卡搬去佢屋企，準備着手製作禮服時，佢就覺得好鬼驚，佢用普通話表示：「因為我怕警察會以為我們家是偽卡集團。」
無綫藝員李中希同李天翔噚日為去年嘅一宗交通意外，去將軍澳警署報到，佢哋話案件重要等待一啲化驗結果，下個月二十八號再要返番警署。李中希好友揚明早前涉被毆打，李中希話：「因為咁，啲警察頭先見到我都笑我，好似樣樣都關我事咁。」
中國星上年投資嘅《大隻佬》同《忘不了》喺金像獎都有好多提名，老闆向華強夫婦都好開心，不過向太陳嵐話外傳劉青雲同中國星已經滿約，其實重未完，若果出面有好戲想搵青雲做，中國星都會考慮外借，之前英皇想外借青雲拍戲，但因為檔期遷就唔到先至推咗。
馮寶寶噚日下午同老公一齊，神神秘秘咁去到將軍澳警署報案室，逗留一陣就急急腳離開，記者追問佢哋因乜事報案，但佢哋好唔耐煩，馮寶寶老公重係咁話：「冇嘢，冇嘢。」但最終馮寶寶就話：「唔見咗卡啫。」之後兩公婆又雞咁腳趕住走。馮仁昭覺得好奇怪，佢哋去報失啫，使乜咁緊張呀！
五度提名奧斯卡「最佳導演」嘅荷李活名導演馬田史高西斯最近開晒口話想執導《無間道》，令《無》片威盡荷李活。而身為《無》片導演兼編劇嘅麥兆輝，最近就獲香港電影金像獎邀請拍宣傳片，聽聞條片以「開心」為主題，講一班觀眾入戲院欣賞一部開心嘅電影，將舊年唔開心嘅事一掃而空喎！
馮仁昭之前都收到風話梁朝偉同女友劉嘉玲，前晚情人節喺跑馬地一間餐廳訂咗枱慶祝，點知有記者去到只係見到白韻琴同男友謝偉俊嚟食晚飯，白姐姐話：「餐廳啲人話偉仔知道咁多記者喺度等，佢寧願甩底唔嚟。」謝偉俊就因為對眼爆咗微絲血管，腫到似合桃，佢貪靚所以戴住副黑超嚟。
