傳咗好耐，唔少Fans期待已久嘅全新MiniCooper開篷車，廠方終於落實投產，並會於嚟緊瑞士日內瓦車展中亮相㖭！一如過往，廠方會先推出入門版嘅MiniOne及標準版嘅MiniCooper開篷型號，至於話高性能嘅CooperS開篷小跑車，亞Mark相信一眾MiniFans就要多等半年至今年底或明年上半年喇！唔講唔知，自從納入咗寶馬旗下後嘅全新Mini車系，踏足香港不過兩年多時間，銷量一直持續上升，至今香港嘅總銷量，喺亞洲區僅次於日本咋！你都咪話香港唔多捧場客呀！有見及此，亞Mark聞得部全新開篷Mini，亦會好快登陸香港，大概會係今個夏季嘅六、七月左右啦！若然你係MiniCooper開篷車嘅忠實擁躉的話，就要去Showroom打探吓消息，話唔定有機會成為首批新車嘅車主㗎！