中央頒下聖旨，港人治港即係愛國者治港（港人治港是以愛國者為主體的港人來治理香港），乜嘢叫做愛國者？《星島日報》引述鄧小平文選第三卷：「港人治港有個界線和標準，就是必須由以愛國者為主體的港人來治理香港。甚麼叫做愛國者？愛國的標準是，尊重自己的民族，誠心誠意擁護祖國恢復行使對香港的主權，不損害香港的繁榮和穩定。」
鄧小平對愛國嘅定義好簡單啫，司徒華、何俊仁就係老牌愛國者。司徒華精通中國古籍、中英開始談判時，佢就站出來支持中國收回香港，而嗰陣時好多行政立法兩局議員，現在嘅忽然愛國派，就猛咁推銷「主權換治權」，暗中支持港英；至於香港繁榮安定喎，邊有人想搞破壞呀？係唔係何鴻燊口中嘅紅鬚軍師？
搞民主普選唔等於破壞安定繁榮，唔等於搞破壞，相信未跟李天命學習思考藝術嘅人，都會完全明白，只有嗰啲知道阿媽係女人，重要講：「大原則係，阿爸係唔係男人」嘅人先至會混淆不清。余若薇與曾鈺成，邊個愛國呢？金堯如與徐四民比，邊個愛國呢？曾憲梓、鄔維庸、黃宜弘與司徒華、湯家驊、曾俊華比，邊個更愛國呢？愛國者邊度有得欽定㗎？用鄧小平嘅標準，二十年前范徐麗泰唔算愛國，今年嘅范太就比何俊仁更愛國？諗吓都好笑。與C博士講起佢愛唔愛國，C博士話：「北京政局外弛內張，退休派與胡溫繼續角力，目前正是說話寧左勿右時期。雞毛不可當為聖旨！」