新車速報：<br>本田OdysseyAbsolute創新按掣收摺座椅

新車速報：
本田OdysseyAbsolute創新按掣收摺座椅

本田Odyssey豪華七人MPV，經歷兩代蛻變之後，路向卻有180度大轉變，不僅係一部出眾豪華MPV，而且重滲入有時尚富High-tech味道，加上Absolute頂級版一台輸出達200匹嘅2.4公升i-VTEC偈，匹配一身專用包圍配搭，還有跑車化嘅5前速半自動波組合，同埋一按式電控收摺尾排座椅設計，喺一眾講求斯文嘅MPV車款中，可會有一新耳目又突破嘅感受呢！
記者、攝影：陳偉林

本田Odyssey車系一向以高檔豪華MPV形象示人，自推出以來亦不乏捧場客支持，尤其係第一代後期嘅天幕式玻璃頂配搭，至今仍未有新車款可及；惟其包裝及個性，卻一直未有突破，漸為其他同級對手嘅鋒芒所蓋過，及至去年下半年廠方宣布，正式推出新一代Odyssey車系，又再勾起一眾本田車迷嘅盼望呢！




Absolute特別版跑格鮮明
早陣子，我哋率先測試過全新Odyssey，其獨特造型加上特低車高，既有利出入室內車場，而且重大大提升行車穩定性同低重心嘅好處；惟講到吸引力，今趟呢部頂級OdysseyAbsolute，可謂至出眾又見有突破感。皆因全車有專用跑車包圍外，一對魅力盎然嘅HID大燈，重有原廠霧燈及17吋跑車合金胎軨組合，一份MPV以外嘅跑格油然而生，自然較一眾同級車表現更突出呢！

■除一體式泵把連氣霸之餘，Absolute版重有原廠霧燈裝置。

■扁平HID大燈組合，好有一份誘人魅力。

■高亮度立體三角尾燈裝置，既清晰又易看。

■車廂鋪排豪邁又見跑意，絕非一般MPV可及。

■電天窗後方備有後排獨立照明、送風及冷氣調校。

■大型立體中控台上，置有恒溫冷氣及高級CD音響裝置。

專用設備講究又豪邁
唔單止賣相出位，就連車廂三排七座位，空間既寬敞又見組合多變，前、中排不僅配搭成敞大卧鋪，尾排更有一按式電控，可整幅收摺放平，配合中排可有多兩倍載物空間，又或者將尾排倒轉成郊遊安樂椅呢！
再者，此車備有三輻式跑車軚環，又有金屬味重嘅短波棍設計，還有金屬腳踏及門枕㖭！其他設備重包括前後恒溫冷氣、高級音響同全車6個安全氣袋及充氣簾幕㗎！

■三排獨立座椅剪裁貼身舒適，重備有頭枕及中央手枕設計。

■前排之間置有大型活動桌几，內置有雜物匣及杯座。

200匹i-VTEC偈好突出
全新Odyssey用上偏平樹脂製65升油缸，橫置於後軸前方，既有高保護性，又可以平衡前後車重、降低重心嘅功能；而一台擁有高達200匹輸出嘅2.4公升i-VTEC偈，匹配5前速半自動波，明顯起跑加速反應強而有勁，加上獨立低矮嘅雙搖臂組合，高速走彎時又見循迹力強。再者，主動式電子VAS裝置匹配四輪碟煞、ABS連EBD組合，重有高制動表現㗎！




一按即收

■極具立體感嘅表板鋪排，悅目又易看。

■Absolute版備有金屬防滑腳踏，倍見一份跑味。

■尾排可作一按式電控收摺，同級車中可謂無出其右。

記者評語：個性獨特展魅力
繼早前測試過一部全新版本嘅Odyssey之後，今趟呢部頂級Absolute型號，不僅造型豪邁富跑意之餘，一台2.4公升i-VTEC偈表現亦見剛勁加速力強，加上Absolute版多項專用配套，倍見多一份尊貴感及獨特性，操控及駕駛感覺又豈止一般七人MPV咁簡單呢！

■Absolute版用上重金屬短波棍，另外重有5前速手動轉檔功能。

本田OdysseyAbsolute規格
引擎：2354cc直4DOHC
馬力：200ps/6800rpm
扭力：23.7kgm/4500rpm
傳動：5前速半自動波，前輪驅動
懸掛：（前）雙搖臂（後）雙搖臂
制動：（前）透氣碟（後）碟式（ABS）
輪胎：215/55R17YokohamaAspec
尺碼：4765×1800×1550mm
軸距：2830mm；車重：1640kg
平均耗油：11.0km/L
新車售價：港幣34萬元起
車輛提供：AT1000.com（25252109）

■新車用上一台擁有200匹輸出嘅2.4公升偈，起跑剛勁有力。