上個禮拜滙豐大班艾爾敦罕有咁話，擔心樓價升得太急，不利經濟，重話有炒賣迹象。第二日地產界就齊齊話冇咁嘅事，只有零星炒賣活動，而且強調，樓價升得一啲都唔急。
雖然業內堅稱冇炒風，但係摸貨成交報告，就每日一大堆。
好似天水圍嘉湖山莊翠湖居二座高層E室，炒家上個月八十萬買番嚟，早兩日八十八萬賣出，一個月唔夠賺八萬，好過打工。
啱啱入伙嘅鰂魚涌逸樺園，一座低層B室，月初買入價係四百四十萬，點知早兩日，竟然可用四百九十萬摸出，半個月贏五十萬，兩個禮拜樓價可以升一成，咁都唔算炒？
另外，之前有個九龍廠家，一口氣買咗六個元朗綠庭園嘅單位，短短兩個禮拜，摸出四間，賺咗成十萬蚊。
同區YOHOTown同帝庭居，都錄得二手轉讓，賺十萬至二十萬。
對買咗樓嘅業主嚟講，可能係好消息，未入伙已經好似賺咗咁。
講真，香港人一向無炒不歡，有得炒即係有錢賺，試問邊個會嫌錢腥？
業內人士話，銀行近期不斷向測量師行查問，睇吓成交價係咪真係升得咁緊要，咁當客戶攞磚頭嚟借錢時，都可以知道值幾多，可以減低風險啦！
測量師行為咗可以緊貼市場走勢，搞到要為員工再培訓，要佢哋親身落地盤，感受吓樓市氣氛，咁同啲客講嘅時候，都實在啲同貼市好多。當然，測量師都要不斷睇實個市，唔係好快就「out」嘞。
業內話，個市係羊群心理，已經唔可以用理智去分析。好似股市，急升完一輪，市場都覺得要調整，但係樓市就冇壞消息出現，所以暫時都冇調整嘅藉口。
太古地產起嘅樓，吸引唔少日籍租客，究竟有乜咁吸引呢？
中原高級分行經理許志凌解畫話，原來日籍租客好注重發展商品牌，而太古嘅太古城，喺日本出晒名，啲客嚟香港搵樓，對太古樓自然份外有好感啦！所以啱啱入伙嘅鰂魚涌逸樺園，有唔少日籍租客查詢。
由於佢哋好鍾意新樓，太古新樓好多時成為日人聚居地。況且新樓有會所，設施都多啲。
有啲日籍租客表示，租新樓會安全啲，唔怕地震喎！
其實，太古都有因應呢批客嘅需要，提供相關設施，好似可以收睇日本當地電視嘅「鑊仔」。
香港人買樓有時都幾好笑，有啲連地盤都未去過，甚至連樓書都冇睇就畀錢。到收樓嗰陣，就嫌三嫌四。
內地買家就好唔同，就算示範單位搭到幾靚，都堅持要睇現樓。
即使地盤環境幾咁惡劣，踩到一腳爛泥，都要親歷其境。甚至連電梯都未有，戴住頂安全帽，搭籠𨋢上樓，行木板走廊，都冇有怕，為嘅就係睇真啲，免得第日後悔。
當然，法例限制，香港買家想入地盤唔容易。不過，純粹講買樓心態，內地更加實事求是。
有個睇中青衣藍澄灣嘅買家，睇咗好多次樓，一心係諗住等現樓先買。
點知上個禮拜五晚收到風話，發展商周六取消二按優惠，變相加價兩個巴仙。於是嗱嗱聲打畀中原，要求售樓部職員，酌情延遲關門時間。
然後飛撲落街，由大埔屋企「飛的」去中環售樓處。趕到去已經十點幾，二話不說，即刻動筆簽約。終於搞到十一點半，先至完成所有手續。
佢買入一座高層E室，九五七方呎，成交價二百九十三萬，每呎三千零六。
中原青衣助理區域經理麥成輝話，個客雖然搭咗三百幾蚊的士，不過小財唔出，大財唔入。嗰晚如果買唔切，就要畀多接近六萬蚊。
蘭西
電郵地址：
