樓價近日係咁升，地產股股價亦升咗唔少，唔少負債重的地產股趁勢集資，近月來股價屢見新高的新世界（017）就係典型例子，隻股落實5供2，供股價5.40元，較停牌前8.70元，大折讓37.9%，復牌之後，真係唔知會係乜光景？
唔好話大隻嘅地產股，其他中小型地產股一樣靜極思動。經紀陳話，聽聞茂盛控股（022）近排頻頻聯絡證券界中人，問佢哋有冇興趣齊齊玩，似有再開車之意。
小初記得喺去年下半年，個市仍然淡靜之時，上海公路大王購入的茂盛，由0.75元水平一條氣炒上，當公司斥巨資向和黃（013）購入青山藍澄灣酒店項目後，股價最高見過3.20元。
不過，踏入11月後，茂盛成交量開始縮減，走勢轉為平淡，但上個星期開始，股份買賣又再活躍。上周五，突然出現幾手大成交上板，造2.30元，股數合共約3410萬股，涉及金額7800萬元，結果茂盛大升9.89%，收2.50元。
經紀陳話，據講批貨係由1個大戶射畀另一個大戶。
慕容小初