劉德華與張學友事隔十多年後，再合作拍電影，二人駁髮合拍新戲《江湖》，華仔與學友一如八八年舊作《旺角卡門》一樣，分別飾演大佬及傍友，而學友的造型更與《無間道》中的杜汶澤相像，華仔則表示駁髮令他苦不堪言。
劉德華與張學友繼《超級學校霸王》之後，事隔十多年再度在電影中鬥戲，前晚二人於中環都爹利街為新戲《江湖》開工，只見華仔與學友都駁了假髮，一如八八年兩人合作的舊作《旺角卡門》一樣，華仔飾演大佬，學友飾其傍友，兩人前晚都着上Mark哥褸，學友還穿上絲絨西裝，其髮型有點像杜汶澤在《無間道》中的造型。
前晚二人拍攝一場落雨行街戲，電影公司安排大水喉灑水營造大雨場面，學友撐着傘護送華仔，兩人面露笑容一同落樓梯，在身後還有兩名保鑣。前晚雖然是情人節，但仍有三十多名女fans聞風而至，也有一雙一對情侶駐足圍觀。
華仔昨日在接受電話訪問時談到駁髮，顯得苦不堪言，他說：「我嗰日駁咗成十個鐘，好痛又好攰，啲頭髮又重，第一晚完全瞓唔到覺，洗頭吹乾要成粒鐘呀，我習慣早晚都沖涼洗頭，𠵱家要遲一個鐘瞓同早一個鐘起身。半個月後，等部戲拍晒先拆得。」
提到情人節亦要開工，華仔謂：「我年年情人節都要開工㗎，唔係邊得嚟有幾十個女仔喺街度等我呀，重有幾對情侶拖晒手咁，幾有氣氛呀。」
此外，吳君如與男友陳可辛、余文樂及奚仲文都到場探班，而駁了假髮的曾志偉則往監場，吳君如表示男友未有送情人節禮物。
採訪：蔡如育
攝影：何國豪
