亨利喺上個禮拜二贏修咸頓二比○場超聯撞瘀隻腳，由於康復速度緩慢，所以就踢唔到噚晚對車路士場英足總盃（阿仙奴照贏二比一），連帶禮拜三法國對比利時嘅友賽亦踢唔到。表面睇好似冇乜嘢，但我求大俠就認為另有內情。
阿仙奴喺嚟緊嘅禮拜六會喺聯賽作客車路士，如果贏波，佢哋向聯賽錦標又行近一大步，點知好唔好彩，賽前有國際賽阻頭阻勢。你知啦，佢哋班國腳若喺友賽中受傷，咁就大件事；就算冇事返嚟，如果個教練玩嘢，要佢哋打足九十分鐘，都有幾大影響。
我求大俠唔敢話阿仙奴有心同法國隊作對，但賽前兩、三日都冇傳過亨利唔可以上陣對車仔，𠵱家又突然話佢因傷缺陣，重連周中場國際賽都踢唔到，唔通真係咁巧合？
些路迪𠵱家喺蘇超放甩次席嘅格拉斯哥流浪成十三分，博彩公司立博認為大局已定，索性提早派彩，攞逾一百萬鎊出嚟賠畀買些路迪成為聯賽冠軍嘅人。我求大俠認為立博咁做其實係好嘅，流浪同些路迪係世仇，𠵱家佢哋俾人睇死，話唔定可以激起球員啲鬥志，令嚟緊嘅賽事緊湊啲。
史迪近排真係好掂，除咗喺近兩場超聯入兩球幫布力般執咗四分，自己重入選埋英格蘭二十一歲以下代表隊。記得佢上個月重係喺英丙聯比賽，效力赫德斯菲爾德，估唔到𠵱家就有機會喺國際舞台一顯身手；有人認為佢係時來運到，但我求大俠認為，係努力嘅成果。
呢個世界成咗名係一件危險嘅事，做佢嘅親人亦唔見得安全。好似奧雲咁，佢個家姐日前喺屋企附近，爭啲俾人綁票，好在佢不斷掙扎大叫，先至逃過一劫。奧雲為呢單嘢搞到好煩，日後同家人真都要步步為營。唉，希望今次事件唔會影響奧雲喺周中友賽葡萄牙嘅表現就好啦。
突尼西亞歷史性攞非洲國家盃冠軍，相信最開心嘅唔係班球員，而係教練拿美爾，因為呢個前法國隊教頭喺○二年世界盃，竟然以衞冕身份，喺初賽一和兩負同冇入球之下出局，真係都幾經典，之後佢梗係俾人炒咗，但係一年半之後嘅今日，佢絕地反擊，證明自己係有料之人。