上周五升市中，大隻銀行股以中銀（2388）最出色，收15.60元，有25仙進帳，Call輪自然受到帶動。
中銀Call輪有負溢價嘅9115升8.4%；同係10月夠鐘嘅9261同9316，升6.5%與6.6%，呢兩隻都係熱炒中銀輪。9218亦係熱門貨，單日成交2.69億份，則只有2.2%升幅，收22.9仙。
貨比三家不吃虧，𠵱家揀中銀Call輪，要9218，未跟貼正股之後，啲數據靚晒。9261喺10月到期，溢價8.7%，槓桿率6.4倍；9316壽命短過9261兩個禮拜，溢價7.4%，槓桿率8.9倍。9218槓桿率6.8倍，唔係弱好多，但溢價3.7%，則着數唔少。短線博正股繼續去，炒中銀Call輪最好向9218埋手。
禽流感未有令航空股向下跌，國泰（293）上周五收15.20元，升15仙，直撲近排新高，南航（1055）與東航（670）更厲害，升破上月高位。航空股有勢，國內兩隻航空股冇輪可炒，國泰可供選擇有限，9170可以諗吓，年底到期，輪價33.5仙，溢價4.2%，槓桿率4.5倍。9301買賣易啲，槓桿率高啲，自然要畀高好多溢價，唔多化算。唔買國泰Call輪，可以研究吓太ACall輪9372，國泰升，都會帶埋太A（019）升。
章 盛