NBA場內場外星閃閃
里安納度拍拖睇花式入樽　爽！

一年一度嘅NBA明星賽一向都會吸引好多鍾意睇籃球嘅荷李活名人，今年亦唔例外，由於前日係情人節，所以有唔少紅星同另一半一齊睇波，兼慶祝情人節。
身為標準籃球迷嘅萬人迷里安納度狄卡比奧（LeonardoDiCaprio）當然唔會錯過呢個NBA嘅盛事，所以見佢拖埋巴西名模女友GiseleBundchen一齊睇周末嘅賽事，佢哋欣賞花式入樽比賽等項目嗰陣，不時打情罵俏兼喁喁細語，難怪成日傳佢哋會結婚啦。

合家同歡
另外，黑人影星韋史密夫（WillSmith）亦同愛妻珍達娉琪（JadaPinkett）以及五歲嘅仔Jaden去睇波，韋史密夫重着住件東岸明星隊波衫，遠睇真係以為佢係NBA球員。
此外，身為洛杉磯湖人超級球迷嘅積尼高遜（JackNicholson），自然亦係座上客，佢同囡囡睇三分賽嗰陣笑到合唔埋口。而前一日狄美摩亞（DemiMoore）就帶埋佢個孻女Tallulah睇波，不過身邊就唔見男友艾斯頓古查（AshtonKutcher）。