去年沙士襲港，香港醫學界對付疫症立下唔少享譽國際嘅功勞，其中破解沙士元兇冠狀病毒嘅香港大學微生物學系系主任袁國勇，一夜成名。噚日佢接受任關佩英訪問，大爆少年事迹，原來佢同醫管局專業及公共事務總監高永文係皇仁同班同學，入到港大又一齊讀醫，袁國勇話自己讀書麻麻，「次次考試都輸畀佢」。
除咗一齊讀書，兩人連嗜好都一樣，分別係天文學會會長同副會長，兩個少男每到周末唔拍拖，齊齊走去頭岳岳睇星星，袁國勇話後生仔心雄，嚮往無限宇宙，人大咗就掉返轉頭，研究最細微、但對人類影響好大嘅微生物。
袁國勇𠵱家成為大教授，回想畢業後喺聯合醫院行醫歲月，佢話由於觀塘多金舖劫案，曾經九次處理槍傷病人，「兵賊都有醫過」。袁醫生侃侃而談當年之際，書友高永文就要去立法會作供俾議員煎熬，真係同人唔同命。
傳真︰2623-9278
電郵︰