小紅偶然行書局，喺德輔道中嘅老牌書局齡記睇書，無意中見到一本一千三百頁嘅舊書，只賣一百蚊，於是立即買咗返屋企，揭完之後對左丁山講：「呢本書好啱你噃，買唔買？」左丁山於是叫小紅代購一本，呢日佢送到左丁山手上，嘩，乜咁重㗎，當年點解會有人出版嘅？
當年就係一九六四年，小紅阿媽可能重係拍緊拖，本書叫做ADictionaryofChineseIdiomaticPhrases（中華成語辭典），作者HuangYen-Kai，呢位黃先生編排、繙譯、註解一腳踢，真係一位有心人，佢將呢本書送畀馬來西亞華文老師，可能係用作馬來西亞華人學生教材都唔定。
黃先生嘅序言話，本書包含三萬餘條中文句子，用Wale-Giles拼音法，每條都係四個字，有新有舊。新者如：「僱員酬金kuyuanch'ouchin」，繙譯成compensationsforanemployee。舊者如「顧曲周郎kuch'uchoulang」，英文解成：ChouLangexaminedthesongs-toinstructtherhyme！出處：三國志——周瑜精音律，時有曲有誤，周郎顧之語。」
其他如「三元及第、三五成群、三言兩語、三三五五（李白詩：三三五五映垂楊）、三令五申、三頭二面、三戶亡秦、三分鼎足、三多九如、三姑六婆、三人成虎等等，既有英語繙譯解釋，亦詳列古籍出處，睇到左丁山眉飛色舞。如果有人將呢本書變成漢語拼音版，更切合時代需要。估唔到四十年前有位黃先生咁好心機編書，四十年後左丁山用一百蚊就買到，多謝都嚟唔切。