陳小春重視家庭生活，除了「風火海」時期，他一直和家人同住。他恨結婚、恨生仔，最想娶個叻過自己的老婆，更稱「食住我唔好咩」。至於和張栢芝之間似有還無的戀情，據小春自己形容是「支吾以對」，同時強調傳媒不能影響兩人的感情，因為他倆的感情不是「咁流」的。
昨日是情人節，小春表示要在工作中度過，無閒情去想兒女私情，亦無打算購買禮物送給異性。他的好友張栢芝同樣今年沒有情人相陪，問他會否送栢芝禮物？小春說：「冇送喎，佢大把人追啦！𠵱家真係冇時間去諗其他嘢。」
問小春會否為喜歡的人跪地示愛？小春不屑地說：「示愛要跪地嘅咩？男兒膝下有黃金，示愛有好多方法，係用心而唔係靠把口嘅。咁叫做冧女，唔係求愛！」
小春和栢芝的戀情傳了年多，一直似有還無，傳媒圍繞兩人的話題一直沒完沒了，小春則由頭至尾堅稱兩人只是好朋友關係，他說：「傳媒成日問我佢啲嘢，係厭煩㗎，但冇咁易影響我哋之間嘅感情，大家見到面講嘅嘢先至作準，做朋友唔係咁流嘅！」問小春傳媒是否破壞了他和栢芝的好事，他即笑笑口說：「乜嘢叫好事？」然後又顧左盼右曖昧地說：「唉，支吾以對啦！」
小春聲稱自己現時沒有女友，但很想結婚生仔，家人亦有催婚。小春說：「睇相佬話我今年紅鸞星動，我都好想係真，屋企人梗係恨我結婚。」問他若找到另一半可會公開，小春說：「睇吓大家知唔知囉，知咪公開囉，冇乜所謂。」
看來是大男人的小春，估不到他的擇偶要求是要女方叻過自己，他說：「我唔叻嘛，所以想搵個叻過自己嘅，食得住我唔好咩？我唔知怕老婆係咪會發達，但係怕就好過唔怕，老婆係要嚟錫嘅，最理想係結咗婚佢唔做嘢啦！」
不過小春慨歎佳偶難尋，他說：「我嚮往家庭生活，你話我樣生得花弗，咁無形中就少咗好多機會。圈外人覺得你複雜，都係唔好搞嘞，圈內人相對機會大啲，但係又好麻煩。我未試過拍緊拖因為畀人話我咁咁咁，對方就話要分手，但係未開始相處嗰啲，梗會有嘅。」
