今個星期碟場熱爆話題，當然係新鮮熱辣公布嘅23屆香港電影金像獎提名名單；當中有7個獎項提名嘅《無間道III：終極無間》，好似有心嚟趁熱鬧一樣，重撞正今個星期出碟！第一集《無間道》大受好評，《無間道II》就留下唔少問號，《無間道III》就為咗呢個錯綜複雜嘅劇情給予答案，再加埋今次DVD版有Director'sCut加長版，戲院睇時一頭霧水，今次DVD版一定有「長」盡解釋！
記者：許福合
23屆香港電影金像獎提名獎項
最佳電影
最佳編劇
最佳攝影
最佳剪接
最佳電影原創音樂
最佳音響效果
最佳視覺效果
今次《無間III》除咗有普通版外，更為戲迷預備咗個特別限量版，非常值得珍藏，換上個精美包裝，當中包括96頁精裝Postcard特集，以及一個無間版嘅八達通卡套，嫌唔夠實用，重有一個《終極無間》水杯。
今次《無間III》最特別係會收錄咗個兩個版本，其中公映版同以前喺戲院睇嘅版本分別不大，不過筆者推介各位欣賞Director掇Cut加長版，經過重新剪接之後，戲味更濃，電影感十足，有助明白故事嘅前因後果。
DVD版總唔少得隻Bonus碟，《無間III》就特別收錄咗製作特輯同台前幕後嘅花絮，主要演員亦會分享心得，另外還有靚靚海報同李克勤主唱嘅MV，當做飯後甜品簡直一流。
故事主線係講陳永仁（梁朝偉飾）被殺後十個月，劉建明（劉德華飾）受調查派到庶務部工作，其間認識年輕警司楊錦榮（黎明飾），發現楊與韓琛及生意拍檔沈澄（陳道明飾）均有聯絡，於是懷疑楊同為黑幫卧底，為咗保護自己避免身份曝光，惟有先除掉楊！
原來楊與劉不同，係一名真正警察，而且與陳永仁屬同一屆警校出身，而沈澄與陳均為警方卧底，最後劉更反被楊布局令身份曝光。不過最後結果出人意表，步陳永仁後塵反而是……。
老實講，即使睇過第一、二集，要清楚了解《無間III》劇情，仍有唔少難度，因為劇中不斷喺陳永仁被殺前後穿梭，而貫穿兩個時間就靠李心兒(陳慧琳飾)，加上導演拍攝手法，如劉建明與已死嘅陳永仁會同時出現，均會令觀眾混淆，可能導演都知道此一毛病，每次回到03年都打出字幕，但對了解劇情作用不大。
《無間III》內容文戲居多，槍戰場面較少，用得着5.1同dts地方唔多，但仍可選擇以闊屏幕畫面欣賞，以享受更強嘅電影感！
DVDPRO
地址：旺角奶路臣街德發商場地庫B4鋪
查詢電話：23326326
