陳小春近日忙於為月底的演唱會綵排，個唱會以「夜生活」做主題，他表示大家對他的夜生活有興趣，所以索性做出來讓大家看。至於緋聞女友張栢芝會否做表演嘉賓，小春說：「佢唔得閒，應該唔得。嘉賓已經定得七七八八，有『風火海』囉，作個人發展之後大家都冇合作過，我都好期待。」
演唱會賣票成績好與壞，小春自言不會理會，他說：「我唔諗㗎，有時間都諗點做好個騷啦，呢排日日排舞壓力好大，時間好緊迫，有幾隻舞未排，唔知效果點，激唔激？我唔mind㗎，有幾大膽就幾大膽。」
近年小春唱歌演戲兩方面都發展順利，雖然對成績感滿意，但同時又覺得自己可以更好，最大的障礙，是未能和傳媒好好溝通。
小春說：「我覺得自己算幸運，以前只係一個普通舞蹈藝員嘅身份，呢十年內各方面都有啲嘢，但可以話係全靠幸運咩？我覺得自己應該唔只𠵱家咁嘅成就，衰在唔識做人、唔識得同人溝通，尤其對住記者。衝口而出係人都會，但有時我講嘅冇傷害，寫咗出嚟就變咗傷害，呢啲嘢我事先係想像唔到嘅。呢兩年好啲啦，有啲藝人好識講嘢，閃光燈都可以講成百萬字，我就唔可以咁健談。」
小春去年發生和記者衝突的事件，就是未能和傳媒融洽相處的例證之一，他說：「我覺得好唔fair，點解一定要受呢啲有形無形嘅輿論壓力？畀番啲空間我啦！唔知點解，夜晚一俾人見到出現，件事就一定唔會好，我真係有被侵犯嘅感覺，最好可以禁制夜晚影相。𠵱家唯一嘅方法，就係由得佢影，只係希望可以手下留情。有啲記者真係專登激嬲我，咁就有新聞，𠵱家我都識處理，總之你唔好掂到我，一掂到我就報警先。」
不過小春亦承認性格暴躁，他說：「其實公司都有同我講過吓，叫我收斂少少，但係我唔係專登撩事鬥非，我覺得自己係俾人恰緊喎，不過我都會收斂吓嘅。」
小春有兩個妹妹一個弟弟，家人在他心中永遠排第一位，除了「風火海」時期試過搬出去住外，他一直和家人同住，小春說：「如果將來結咗婚，我都想同屋企住，我鍾意一大堆人喺屋企嗰種好溫暖嘅感覺。」
問小春是否家中的經濟支柱，他說：「最細嘅細妹都要養家，邊個有能力咪畀多啲囉，冇分嘅。屋企係我做嘢嘅最大原動力，亦係絕對唔可以侵犯嘅。」
小春表示自己沒有刻意去保護家人令他們不曝光，他笑說：「可能我屋企人平庸啲，冇乜星味，但我阿媽曝光率幾高㗎，佢叫阿嬌吖嘛！有一次我同阿媽去睇醫生畀記者影咗相，嗰次係我第一次聽佢講粗口，我都好驚訝佢會有咁嘅反應，可能佢病緊心情唔好。」問小春父母會否因他而覺得驕傲，他說：「我屋企人唔係呢隻，冇乜proudof我㗎，佢哋都唔知娛樂圈係乜一回事，只係睇吓報紙咁咋。」
採訪：張止寒
攝影：林德雄
