香港寸金尺土，好多建築物都翻新再用，有無諗過巡緊嗰個街市、逛緊嗰間超級市場，原來已經有上百年歷史，唔少建築物重被定為法定古迹㖭，今日就介紹以吓5個地方，睇下古迹如何今用。
記者：陳震霖 攝影：Wilson
模特兒：Maggie、Gisele（Imagine）
舊大埔墟火車站建於1913年，九廣鐵路通車之後3年落成，1984年大樓被列為法定古迹，1985年改裝成鐵路博物館，畀市民免費參觀。博物館一啲都唔悶，除咗一大堆舊相同文字資料，重有實物舊式車卡畀你憑弔，一字排開任你影靚相，部份車卡重開畀市民親身入座。
館內有卡窄軌蒸汽火車頭，身世勁辛酸，話說沙頭角支線結束後，火車頭就賣畀菲律賓使用，直至90年代，九廣鐵路先再向菲律賓買番，修復後放喺博物館展覽。
地址：新界大埔墟崇德街13號（26533455）
開放時間：9:00am至5:00pm，星期二休息
交通：九廣鐵路大埔墟站乘的士（$12.5）直達。
建於1859年嘅舊赤柱警署重誇張，前身係警隊同英軍前哨站，二次大戰俾日軍佔領，戰後重出生天，再度成為警署至1974年。不過真係估唔到古迹可以咁樣今用，先大肆裝修變身餐廳，2000年1月又變身成𠵱家嘅超級市場。
由於係法定古迹，所以建築商好合作，裏面嘅麻石牆、木橫樑、木樓梯依然保留，Shopping嗰陣，記住多啲擔天望地，欣賞吓呢間香港現存最古老嘅警署嘞。
地址：赤柱赤柱村道88號
交通：中環交易廣場乘6號巴士（$7.9），赤柱巴士總站下車，沿赤柱村道徒步直達。
舊上環街市於1858年建成，現為法定古迹，愛德華式建築風格，百幾年來都係師奶太太買餸聚腳嘅好地方，原先有南北2座，南座早已拆卸；1991年，有發展商將北座大樓翻新，變成𠵱家樓高4層、專門售賣特色手工藝品及家鄉食品嘅西港城，原本喺花布街擺檔嘅舖頭統統搬上西港城2樓。
地址：上環德輔道中323號
交通：上環地鐵站C出口，轉左經干諾道中步行直達。
美利樓重巴閉，原址坐落金鐘花園道，建於1844年，樓高3層，屬古歐陸維多利亞式建築物，以巨型花崗岩建成，一方面用希臘圓形石柱，另一方面又加中式瓦片做屋頂，名副其實中西合璧。
1982年，美利樓難逃拆卸厄運，當局好小心咁替花崗岩標上編號，選址赤柱重建，當時95%嘅大石得以保留，剩下5%就令到建築師十分頭痛，惟有好辛苦咁搵其他石代替。最後，2000年重開畀市民參觀，今時今日，美利樓就已變身4間餐廳同展覽廳。
地址：赤柱佳美道赤柱廣場
交通：中環交易廣場乘6號巴士（$7.9），赤柱巴士總站下車，沿赤柱市場道徒步直達。
高街鬼屋，有鬼無鬼姑且不論，不過呢所建於1892年嘅古宅的確巴閉，前身先後係醫院、日軍總部、行刑場同精神病院，空置之後又曾經兩度大火，令原本磚木結構嘅破落大宅更加陰森，90年代中，外牆封上圍板及鐵欄，有關當局明顯唔想有人入去探險。
靈異之說多不勝數，甚麼煙霧幽靈、轉角位綠光、二樓尾房唐裝惡鬼等等，講咁多都無用，一切已成過去，2001年鬼屋變身西營盤社區綜合大樓，新建大樓只留番古宅1幅前牆。
地址：西營盤高街2號
交通：銅鑼灣三越百貨門口，乘23號巴士（$5.7），豫苑落車。
