泛民主派日前協商成功，港島區派出五個人參選立會，余若薇、梁家傑同何秀蘭一張名單，馬丁同楊森一張，八方日前喺香港發展論壇問余大狀，係咪會喺港島出線？佢陰聲細氣、好溫柔咁話：「如果我今年九月選立法會，我會喺港島選。」至於排第幾，係咪排第三都冇所謂？佢都話目前答唔到八方，因為重有好多未知數，同時要聽吓啲熟悉選舉工程人士嘅意見。
Audrey講嘢咁小心，皆因胡國興睇得好實，你一話去馬，佢會開始計選舉經費，到時就好大鑊。
余梁出戰港島，好多人為民主黨擔心，因為有學者做過調查，Audrey簡直係一個吸選票機，啲被訪者一面倒選佢，加上梁家傑，馬丁同楊森可得選票所餘無幾，真係危危乎，唔知泛民主派到時點配票先可以力保五個席位，兼且你亦唔可以當民建聯同范太冇到。
對於人家話佢咁厲害，余若薇只係笑一笑，話唔可以信晒啲調查，不過只要睇吓余大狀一開口就俾大批記者圍住，就知佢魅力沒法擋。今日如果一人一票選特首，余若薇贏梗。
（圖）余若薇（右）被譽為「吸票機」，喺佢旁邊嘅蔡素玉都咪話唔驚。
傳真︰2623-9278
電郵︰