噚日係情人節，但石修個仔陳宇琛（石仔）喺咁浪漫嘅日子中撞車，最後石仔為息事寧人，就賠咗二百蚊畀對方了事，但當黑成咁，難怪石仔都忍唔住同在場嘅記者呻：「我啱啱到中環就撞車，唉！掃晒興！」
噚日凌晨兩點鐘，石仔揸住佢部標緻房車，載住一男一女朋友途經中環德己立街時，唔小心同一部的士發生輕微碰撞，的士嘅車頭撞向石仔架車嘅左邊車身，的士嘅泵把未有損毀，反而石仔架車嘅左邊沙板就有些少凹陷，於是石仔就落車同的士司機理論，而個司機就要求石仔賠錢。
當時有經過嘅警員就勸喻佢哋先將車輛停埋一邊，再自行協議解決，石仔先拎住部手提電話影咗兩部車撞完後嘅情況，而司機就好大聲咁話：「又話賠錢！又話唔賠！想點呀？報警呀！」而石仔就只肯畀二百蚊對方作賠償。
司機係咁叫石仔去報警，到記者出現時，石仔即時表現如遇救星，佢同記者講：「唔該影一影佢個樣，影一影佢個車牌，我驚佢唔認數，驚佢報警呀。」就喺呢段時間，有幾位外籍人士見啲記者影相，竟然湊熱鬧趴喺車頭扮撞車，重企喺石仔後面扮鬼臉㖭。而張智霖、郭富城同沈嘉偉亦咁啱喺對面街經過，但佢哋一見記者，就即時加快腳步鬆人。
陳文媛（BoBo）噚日帶埋佢嗰隻七個月大嘅狗仔Vanilla去商台出席活動。玩遊戲時，BoBo更被抽中着上三點式泳裝嚟引狗仔跑到終點，結果佢隻狗仔以三秒鐘完成比賽，成為全場冠軍。唔知BoBo平時訓練狗仔時係咪着三點式嘅呢？
劉玉翠早前公開患上焦慮抑鬱症，噚日情人節佢喺港台接受訪問，提到男友一直不離不棄時重感觸落淚，佢話自己𠵱家試緊隻新藥，係專醫腦血清素失調，已經好咗七、八成，以後更加會積極推廣，希望令都市人正視呢種病。提起藍潔瑛近期病況時，劉玉翠就話：「佢個病已經太耐，加上可能食埋其他藥，對腦部造成好大傷害。」
薛家燕（好姨）前晚帶埋仔女去銅鑼灣睇妮歌潔曼齣《亂世情天》，好姨話係特登嚟睇妮歌潔曼喺戲入面嘅十大經典接吻鏡頭，順便偷師喎。原來好姨嚟緊喺《皆大歡喜》入面都會有一場接吻戲，不過對手就重未有人選，好姨話：「畀我揀就梗係要李察基爾啦，其實同熟人就冇咁尷尬，唔熟咪陌生啲囉。」
香港演藝人協會喺聽晚會搞新春團拜，到時會有好多節目，而其中會有一個環節紀念梅艷芳，阿梅過身之前一直係演協嘅會長，佢死後依然係演協永遠榮譽會長，為咗紀念呢位曾經為演協出過唔少力嘅藝人，到時會選播阿梅生前一啲片段，畀大家懷念呢位一代巨星。
