上星期大市雖然升番上去13700點樓上，但係以個市嘅爆炸力及持久力嚟睇，就唔係太似再有得上，好多散戶都開始覺得個市唔係好穩陣。但依伏勝嘅睇法，個市未必有事，尤其係咁多日嚟進行批股，恒指仍然可以企喺13700點，加埋美國格老話明唔會短期內加息，掃除咗市場對於「息魔」嘅疑慮，喺啲咁利好嘅環境下，班大戶唔炒上就勢係假。
呢排啲公司頻頻向市場抽水，不過有個行家同伏勝講，公司抽水唔一定係唔好嘅，就好似上星期公布有愛爾蘭基金注資嘅慧峰集團（8228）咁就唔同，抽水未必係睇淡嘅先兆。
慧峰做緊嘅3項生意包括媒體、石油及能源服務，同埋貿易服務都唔使太多資金去發展，無端端有人揼咁大嚿錢入去公司度，重攞咗一批公司認股證，咁做法同發行可換股債券冇乜大分別，所以個朋友認為應該係有新搞作，叫不妨多啲留意吓喎。
另外，有個同中國有緊密生意來往嘅鬼佬朋友，話人民幣滙率政策遲早會改，所以即使人民銀行之前出嚟話唔會改滙率政策，佢都話唔信，重身體力行咁買重國企股。照伏勝睇，喺市場經濟主導下，人民幣滙率制度出現變動係一個主流，不過有分析員朋友就多口咁話，若人民幣滙價制度一出現改變，就會第一時間走去買隻中銀香港（2388），皆因中銀香港同國內嘅關係最好，根據過往經驗，國內推行新政策下一定會搵啲試點，所以中銀香港分分鐘會成為欽點銀行去試推新政策，到時中銀個價又點會唔升。佢重話，隻股如果可以揸一輪嘅話，分分鐘見18蚊。
伏勝