老鬼倫去聽DionneWarwick演唱會（二月十日），聽出耳油，啲歌認真悅耳。老鬼倫話：「唯一美中不足嘅就係Dionne畢竟已經六十幾歲，中氣冇以前咁足咯，但係一代歌后仍然功架十足，好嘢即係好嘢。」大凡老鬼樂仕辦老鬼演唱會，會展就塞滿城中老鬼，如老鬼倫呢類成功人士。目前香港最有消費能力嘅人，就係五十歲左右，供完樓，仔女去咗外國嘅雙人夫妻組，拍拖時候心儀、崇拜嘅歌星，𠵱家嚟香港演唱，梗係去捧場啦，幾百蚊一張飛，濕濕碎啫。譬如前一排Lobo等三位老人家喺會展演唱，會展咁大個停車場都全部滿座，老鬼倫為咗搵車位（卒之泊喺車位甚窄兼考功夫嘅瑞安中心停車場），入場遲咗四十五分鐘，錯過唔少靚歌，老鬼倫話：「三個人之中，Lobo最冇得頂，其他兩位，又係中氣不足。」樂仕搵老牌歌星來港演唱，為唔少手袋黨帶來少女時代的快樂。DionneWarwick之夜，A溫太唔之幾enjoy。成班手袋黨包括Shirley、Sandra、Rosanna亦在場，如女中學生般興奮，重溫少女情懷，樂仕好應該每年搞幾次，撫慰少女心！
前幾日，CNN一個節目有RodStewart特輯，介紹佢出道、大紅大紫、離婚、冇人吼，前年鹹魚翻生，唱片大熱賣嘅過程，好好睇。老鬼倫話：「RodStewart唱《DaYaThinkI'mSexy》、《Tonight'stheNight》等，唔需要大動作，應該唔會比以前遜色。如果佢嚟香港，逼爆會展咯。」咦，樂仕哥哥聽住，RodStewart賣一千蚊一張飛都會滿座㗎，請你諗諗佢。