一志置業嘅太子道單幢樓SkyGarden，上個禮拜突擊開賣銷情熱烈，近日重吸引到一家大證券行老闆入番間㖭。聽香港置業高級區域經理葉展均話，個客用七百四十萬買咗高層三房D單位，面積一千零五呎，呎價七千三百六十三蚊，計劃用嚟長線收租。
個客認為SkyGarden景觀唔錯，價錢都算合理，所以諗咗冇耐就扑槌嘞。
原來呢名老闆好留意豪宅市況，重不斷入市吸納，近排買咗嘅有尖沙嘴擎天半島同何文田君頤峰，早年就入市畢架山嘅豪宅。股市近一年愈嚟愈火熱，𠵱家每日成交閒閒哋都有百幾二百億，證券行自然收入豐厚，用一千幾百萬買樓，喺佢哋眼中都係濕濕碎啫。
日前滙豐艾爾敦潑樓市冷水，但從呢兩日市場反應嚟睇，似乎完全唔受影響。投資者用真金白銀入市，對樓市投信心一票。
荃灣翠豐臺早排辦咗個「我的夢想家居」設計比賽，共收到超過二萬幅小朋友嘅作品，經過一輪評選，揀出三百幅入圍作品，會喺屋苑會所展出。
今個月二十二號公布冠亞季軍得主，重請嚟藝人佘詩曼做頒獎嘉賓㖭。
南豐售樓部副經理鍾美燕就話，翠豐臺今年以嚟，賣咗二百伙，剩番四百幾間，農曆年曾經加價半成，𠵱家每方呎賣緊三千蚊，短期內研究會唔會加價。
噚日起，頭十位經中原入市買家，可獲免費代租及收租，安排續約同單位維修保養等服務。
零售市道好景，舖位值錢，𠵱家就算租金回報唔高嘅舖都有承接，所以不時都出現大幅獲利成交。華滙物業倪秀芳講，一名投資者喺○二年，用四千九百五十萬元買入銅鑼灣利園山道三十九至四十七號，地下K舖同J舖連一樓。早前以二千四百五十萬元沽咗J舖連一樓，最近又以四千萬元賣出K舖，年半內賺千五萬元。啱啱賣出嘅K舖，月租十四萬五千元，回報只係得四厘幾。
中原黃培權話，西貢兆日大樓地下三號舖，四百五十呎，剛連租約以三百萬元轉手，原業主一年多賺一百萬元，升值五成，舖位月租一萬二千八元，計落回報得五厘一。
蘭西
電郵地址：