港股噚日低開高收，恒指逼近前高位，收市13739，升114點，下禮拜料可再創今浪新高。未來一兩個月，大市仍會向好，成交若能上番230至260億元，恒指就有動力推向14500樓上。
噚日一早有消息，話中國國務院已批准社保基金投資港股，社保基金「晒士」1330億元人民幣，傳初步撥出之數額，最少都有3%，亦即40億元人民幣，之後會陸續有來。
社保基金投資成績唔理想，一直都受到各方面的壓力，內地股市（包括深滬兩地）有1300家上市公司，但具有健全帳目的，相信唔會多過200家，所以社保基金投資內地上市公司，真係戰戰兢兢，今次獲准投資港股，無疑係為資金開闢一條「穩陣」嘅出路。社保基金既然開綠燈，則傳之已久的QDII（「晒士」好大，達4至500億元），相信亦好大機會可在上半年推出。
社保基金同QDII入市，對港股肯定有利，預計恒指同國企指數的重型成份股，會成為優先吸納的對象，因此，滙豐（005）、恒生（011）同其他「自己人」如中石油（857）、中石化（386）、中國鋁業（2600）、中海油（883）、江西銅業（358）等股票，中長線都可看好。
國企指數重組，新加入6家公司，包括人保財險（2328）、長城汽車（2333）、中航科工（2357）、中國人壽（2628）、魏橋紡織（2698）同紫金礦業（2899），但剔除北京北辰（588），成份股由32家增到37家。新成員中以國壽同人保市值最大，分別進佔大市值榜的第3同第6位。國企指數成份股變動，在預期之內，噚日國企跟大市上升，國指報4943，升75點，重上近日高位，下禮拜可再現突破。
其實，國企指數雖然重係調整緊，但好多國企已創新高（相比1月5日），例如鎮海煉化（1128）、上海石化（338）、安徽海螺（914）、北京大唐（991）、東方航空（670）同南方航空（1055）等，而好多國企的走勢亦形成旗形，隨時會破位而上。國企升浪再現，呢輪俾基金㩒到實實的中石油同中石化，肯定會再成為火車頭。
郭兆誠