富豪成立嘅「香港發展論壇」今日揀正吉日（通勝話嘅，今日係成日，百事皆宜）開壇，舉辦討論會，主題係「福利主義與普選政治」。題目幾吸引，四位講者之中，周永新與雷鼎鳴教授都係溫和溫柔派，諗落唔會產生火花，但係另外兩位，胡應湘爵士與李卓人就夠火爆咯，胡爵士會講車毀人亡，李卓人會大聲疾呼貧富懸殊，好睇過花燈。
洋人迷信話今日係黑色星期五，係不祥日子。香港發展論壇之中，大把富豪留學外國，但個心仍然係中國嘅，信通勝多過信耶穌，使乜驚。各位如有時間，大可唔驚，下午四時，齊到會展中心606-607室捧場，不過地方細小，如果你冇預訂免費嘅入場券，最好打電話（25014923）問吓先。
胡爵士去年將合和實業集團嘅日常業務交低畀胡公子，自己盡心盡力完成未完之志——就係港珠澳大橋，聽講佢當年起廣深高速公路之時，已經有港珠澳大橋之念，二十載匆匆過去，佢仍然為此努力。非公事方面，董特首明益城市大學，委任佢做城市大學校董會主席。胡爵士魄力大，人面高，幫理工大學籌款不遺餘力，譬如李兆基捐四千五百萬元畀理大，當然係佢嘅辛勞。城市大學冇乜大粒佬捐錢，有咗胡爵士之後，有希望咯。一位城大教授對左丁山講，「董生呢次真係幫我哋手！」高興之情，溢於言表。城大之得，乃理大之失，有邊位可以替補做理大校董會主席呢？董先生怕有排諗。