由陳啟宗吹雞嘅「香港發展論壇」今日開壇，總幹事張志剛透露，由於報名踴躍，所以換咗一個大啲嘅會議室，可以容納三百人，有志掹車邊想報名、諗住有朝一日可以跟梁振英搵食嘅，今日可以打電話去留番個位，號碼係25014923。
佢重話，李國章局長已經報咗名，唔知係咪捧陳啟宗同胡應湘場，雖然八方覺得今日個題目「福利主義與普選」同教統局冇直接關係。而余若薇就答應支持李卓人。阿人話，大會原本畀佢請五個朋友做啦啦隊，𠵱家位多咗，阿人可以班馬啦。
煲呔噚日見一班大學研究政治嘅學者聽取佢哋對政改意見，會後中大政治系高級導師蔡子強質疑，煲呔係咪見錯咗佢哋。因為煲呔喺會上不斷咬文嚼字，成晚喃喃自語、若有所思，逐句問佢哋乜嘢叫「愛國」？乜嘢叫「循序漸進」？「實際情況」又係點解？成六十歲人，唔通係俾中央嚇一嚇，受咗刺激上晒身？乜嘢叫愛國，字典都查唔到，煲呔最好去請教吓攞大紫荊嘅楊光嘞。
傳真︰2623-9278
電郵︰