是日打入龍虎榜嘅窩輪，有3件係公司輪。排名第一係冠軍輪2315，由43仙殺上70仙，升幅63%。呢件係新輪，周一登場，明年2月到期，行使價1.68元，溢價32%，槓桿率2.6倍。正股（092）有勢，由1.71元升上1.80元。隻輪係1兌1，正股升9仙，隻輪跟足嘅話都應該只係升9仙，但𠵱家升夠27仙，有挾住貨疏炒高可能，發行量2.134億份，減咗大股東同芬佬所揸嘅部份，市場貨源可只得1億份上下，唔計昨日成交嗰63球，先3日總成交已經去咗56球。另1個可能性，係正股未來走勢預期好勁，隻輪溢價唔低都有人撲落去。
計數買嘢，𠵱家買正股着數過買輪。隻輪昨升27仙，正股升得9仙，如隻輪升得合理，則正股至少要補升18仙，即短期見兩蚊過頭。
萬順昌公司輪561，收56仙，升18%，正股（1001）由1.70元升上1.77元，帶動隻輪。561今年11月到期，負溢價1.7%，槓桿率3.2倍。雖然槓桿率唔夠爆炸，但勝在有負溢價，而正股偏低有上升空間，少少哋，諗得過。
崇高（玩具股）公司輪134由11.3仙升上13.2仙，長命輪，06年12月到期，溢價28%，槓桿率4.9倍，諗唔過，買輪不如買正股（209）。
章 盛