新車速報：<br>日產350Z增裝備展魅力

新車速報：
日產350Z增裝備展魅力

日產FairladyZ車系，自於60年代後期推出以來，一直吸引到唔少車迷鍾愛及追捧，及至去年剛面世嘅350Z型號，以其嶄新富個性嘅造型、高科技汽車元素，以及出眾性能演繹，同樣廣為車迷所受落；有見及此，車廠新近為其推出提升版，除強化操控及安全性外，重加入不少車廂配套新設備，呢種誘惑確實叫人難以抵擋㗎！

記者、攝影：陳偉林

日產呢個Z系列跑車嘅歷史，由60年代後期能一直延續至今日，可謂殊不簡單，歷代新車仍受車迷欣賞及追捧，更可謂得來不易，可見車系本身出眾嘅神髓及演繹，能夠持之以恒，實在叫車迷難以抗拒呢！

■雙出式跑車尾喉，亦能讓你感受到雄渾咆哮聲響。

■小型尾定翼設計，有助增強高速行車時嘅下壓力。

■一體式泵把連氣霸組合，望落獨特又吸引。



強化版更剛勁
而踏入2004年頭，廠方又替呢款350Z推出強化新版，雖然外形未有多大變動，惟四輪由原來嘅17吋胎軨，改換上較大尺碼嘅18吋型號，望落更見跑意及剛勁美外，四輪制動器更改換上高效能Brembo裝置，單係呢份改動，經已教車迷更具信心及安全感呢！

■一對炯炯有神嘅頭燈配搭，有十足照明度。

■四輪改換上大尺碼嘅18吋合金胎軨，有助增強路面循迹性。



車廂提升設備質感強
相比下，車廂卻有不少改動，除原有一雙真皮跑車桶椅，備有電動操控外，一套高級音響更備有音量自動調節，兩旁三點式安全帶，重新增有輔助手挽，座席間嘅中控台更備有膝墊，以備於高速走彎時，不易碰傷乘客嘛！再者，除三幅式跑車軚環具質感外，新加入時款真皮波棍的，亦教人賞心悅目㗎！

■車廂鋪排跑意十足，又見有一份豪邁個性。

■一雙高級真皮跑車桶椅承托力高，另備有電控調校。

■中控台兩旁加有膝墊，為乘客帶來多一層保護。

■三點式安全帶加設手挽，使用時變得方便。



加入VDC助行車穩定
新車沿用一台3.5公升V6偈，除匹配有最新嘅5前速半自動波箱外，新車重加入咗最新VDC車輛穩定控制，加上原車LSD裝置，重有四輪高效能Brembo制動器、ABS連BA配搭，還有EBD組合，行車既穩妥又暢順，高速馳聘下更見突出㗎！

■加大咗嘅車頂前方儲物匣，方便易用之餘，旁邊還有房燈組合。

■跑車化表板鋪排，資料豐富又易讀。



日產350Z規格
引擎：3498ccV6DOHC
馬力：280ps/6200rpm
扭力：37.0kgm/4800rpm
傳動：5前速半自動波，後輪驅動
懸掛：（前）多連桿（後）多連桿
制動：（前）透氣碟（後）透氣碟（ABS）
輪胎：（前）225/45R18BridgestonePotenzaRE040
（後）245/45R18BridgestonePotenzaRE040
尺碼：4315×1815×1320mm
軸距：2650mm
車重：1485kg
新車售價：$438,000
車輛提供： 合誠汽車（23688235）

■改換上新款真皮波棍的，把持更富質感。

■表板右旁除油箱蓋電索掣外，重有VDC系統開關鍵。

■中控台頂端設有油溫及電壓等資料顯示，方便檢閱行車資料。



記者評語：多方面強化樂趣更多
新車全面強化操控及制動，既改用Brembo制動器，又改用18吋合金胎軨，還引入主動式VDC穩定系統之餘，重提升車廂配套，駕駛起來無疑有助提高信心，兼且變得樂趣無窮呢！

■新車沿用一台3.5公升V6偈，匹配5前速半自動波箱，起跑加速反應敏捷暢順。