澳洲靚女天后KylieMinogue同英國壞孩子RobbieWilliams都有個共通點，就係佢哋至今都未能成功攻佔美國市場。最近Kylie的起心肝要喺美國樂壇大展拳腳，佢除咗喺新MV入面重施故技狂sell性感之外，重搵嚟美國人氣節目《粉雄救兵》幫佢提升人氣。
Kylie自知佢喺美國嘅受歡迎程度，同歐洲其他地方相差好遠，為咗打開呢個龐大嘅市場，佢最近就喺新歌《RedBloodedWoman》嘅MV入面大騷身材。
仍然好弗嘅Kylie，喺MV入面狂扭籮柚，又露出招牌性感小蠻腰，佢重擺出好多性感誘人嘅姿勢，好似喺車廂入面換衫，同做佢最拿手嘅扭S動作，相信可以吸引唔少美國男士。
聽聞Kylie一直被美國同志視為icon，所以佢好聰明咁泊咗打破美國有線電視節目收視紀錄嘅《粉雄救兵》呢個大碼頭，Kylie特別搵嚟ChemicalBrothers重新remix作品《Slow》，收錄喺《粉雄救兵》嘅原聲大碟入面，而佢自己亦會喺個節目度客串演出。