現年二十九歲嘅盧巧音（Candy），當年同余文樂曾經發展過一段八個月嘅姊弟戀，諗唔到佢醫好情傷之後，𠵱家又同梅艷芳生前愛徒、現年二十六歲嘅彭敬慈再搞姊弟戀。前晚彭敬慈揸住佢架豐田RX7跑車，夜訪Candy嘅大坑香閨個半鐘，佢重將架車亂咁泊，搞到俾警員抄牌，但為咗見女友一面，被罰三百二十蚊都唔拘啦！
前晚八點半，彭敬慈揸住佢架跑車，頭戴cap帽、着住成身紅卜卜嘅HipHop裝，去到Candy位於大坑嘅香閨，佢將部車泊咗喺街邊，就走咗上樓，但隔唔夠半個鐘，佢部車已經被警員抄牌。
彭敬慈喺九點幾落樓，佢一見車頭楔咗張牛肉乾，即時拎出嚟望咗兩望，跟住又放番原位，再走番上Candy屋企留多半個鐘頭，之後佢至依依不捨咁開車離去。
雖然Candy同彭敬慈唔認拍拖，但上個禮拜至有雜誌影到Candy上彭敬慈喺荃灣嘅寓所過夜，隔咗一個禮拜，又到彭敬慈上去女方香閨，佢重好似返咗自己屋企咁，成晚自出自入，睇嚟佢哋嘅地下情，都唔地下得幾耐咯。
之前彭敬慈為Candy嘅歌曲《落地開花》擔任MV男角，唔知Candy幾時再搵彭敬慈同佢組情侶檔，整多首續集「開花結果」呢？
李蘢怡（Tiffany）近日同郭羨妮（Sonija）一齊合作電影《索女刑警》，佢哋二人都分別係唔同纖體公司嘅代言人，唔知會唔會因為咁，要避忌一吓連嘢都講少呢？不過Tiffany日前就好大方咁話：「Sonija份人好友善
電影《拳霸》嘅泰國男主角TonyJaa噚日嚟咗香港為自己套電影宣傳，佢重即場表演踢腿，近排佢鄉下禽流感肆虐，問佢嚟香港會唔會食雞，佢就話自己好鍾意食雞，相信佢都應該忍咗好耐喇，呢次嚟到香港會唔會食番餐全雞宴頂吓癮呢？
喺香港上咗好耐嘅《全職殺手》，日本最近先有得做。唔知記唔記得戲入面劉德華有唔少日文對白，日本報紙就報道，早兩個星期套戲喺東京首映，啲日本觀眾聽華仔啲對白時笑得好誇張。不過查實套戲拍嗰時，原先係要反町隆史講好多英文，不過反町臨場句句唔掂，最後華仔頂硬上講日文，今次佢都可以話俾人笑得無辜。
梁思浩被無綫炒魷，前日先同班記者大鬧無綫，話為無綫扮豬扮狗都唔要佢。但係噚日查小欣喺節目度就話梁思浩「唔知做乜」，查小欣話：「公司請你嗰陣時冇話明請你一生一世㗎嘛，佢唔係同你結婚，結婚都會離婚啦！公司叫你扮豬扮狗你都要扮㗎啦，你覺得難為咪唔好做囉！」
