由於緊接去年底聖誕及新年假期後，今年1月下旬又係一年一度嘅農曆新年假期關係，致令今年首月汽車銷量，較去年12月嘅總銷量1,772部，下調咗170部，僅錄得1,602部銷量紀錄；當中日本及韓國車嘅銷量下跌咗242部，全月只售出987部新車，反而歐洲車銷量卻有微升，由12月嘅543部車，提升至615部咁多。
其中，日本車能於一月開出紅盤嘅，除咗會係豐田及凌志外，另外重有萬事得汽車；前者豐田因受惠於Corolla、Camry及Picnic有大批新車交客緣故，較12月多售出30部車，全個1月共錄得408部新車紀錄。至於同系嘅凌志亦因ES300及RX300有唔錯銷售紀錄關係，1月份銷量亦較去年12月多增34部車，全月共售出129部新車；然而，全個1月表現至突出嘅莫過於萬事得，皆因銷售總數較去年12月急升63部，共售出103部車咁多。
講到歐洲車方面，寶馬汽車亦可謂先聲奪人，響1月共售出212部車，比第二位平治嘅150部紀錄，總計多出62部，主要原因係寶馬5系及7系，同期銷售持續向好帶來嘅結果；其次表現突出嘅重有富豪及積架，前者因同系嘅S80跟XC90備受追捧有關，後者則因全新XJ及X-Type受車迷歡迎有關。惟相比下，最教人刮目相看會係寶馬旗下嘅迷你谷巴，繼去年錄得高銷量後，踏入今年首月又售出49部新車，以單一車款計算，其表現可謂至突出呢！