布力般前鋒史迪同熱刺迪科一樣，前晚又有波入，加盟新球隊踢兩場入兩球，「牛奶咀」史迪兩個入球幫護級布力般執四分，真係救命分！
史迪前晚完場前五分鐘省入一粒，布力般最後迫和紐卡素，由於其他五隊護級球隊周中輸波，呢一分對布力般都唔好話唔重要。
近年英超的確好少見「丙組仔」前鋒跳級到頂級聯賽，即刻有咁好表現，布力般領隊桑拿士今次用成一百二十五萬鎊，買呢位哈德斯菲爾德前鋒，總算幫自己省番靚個招牌；因為佢季初用成過千萬鎊買幾個球員，𠵱家球隊重排緊十四位，貴價貨巴利費格遜同史堤芬列特，打唔夠半季就傷咗，史迪真係幫桑拿士挽回面子囉！
李鐵向國足報到備戰世盃外圍賽，國內記者睇完佢首次練波後，評佢多失誤兼缺態，教練阿里漢對「鐵子」表現感到失望。我求大俠明白李鐵今季坐多過踢，好難有態，最慘係未來如果無球會肯出轉會費買佢，話唔定喺愛華頓坐足三年冷板，到時連國家隊生涯都亮紅燈就麻煩。
前晚英超聯熱刺贏到查爾頓三比○後，又試俾人追番二比三，再製造贏三球都可以反輸嘅驚險鏡頭益球迷。好在呢次佢哋再入多粒，最後贏四比二。賽後領隊柏列特都話最近三場波總共出現二十個入球，過程真係「豐富」。我求大俠就覺得佢哋嘅比賽，娛樂性夠晒「豐富」就真。
AC米蘭龍門艾比亞迪，喺意大利盃四強兩回合失咗六球。只怪佢出親場都拍住啲副選後衞，好似前晚AC就派哥斯達古達拍騰騰震嘅馬田拿臣，艾比亞迪幾勇（據報佢前晚已屢救險球）都頂唔住。佢連番失球，唔多唔少影響佢爭國家隊第三號龍門踢歐洲國家盃嘅機會，慘。
史特加季中表現跌watt，上場輸畀榜尾嘅哈化；班球員諗住教練馬加夫會罰佢哋加操，點知馬加夫冇咁做，反而要佢哋企定聽佢訓話九十分鐘。我求大俠覺得馬加夫呢招好絕，事關精神虐待比體罰更有阻嚇作用，班球員為咗唔想再企到腳軟，嚟緊對慕遜加柏定會打醒精神。