自從當奴喺北京，遭到蕭蔚雲等老人喺佢條頸輪流噬咬一啖，落嚟香港，講嘢開始學足中方嘴形，向港人傳聖旨，包括中方認為港人未深入了解《基本法》嘅「原則」及「內涵」，同埋上高有人質疑，唔支持23條立法，即是唔「愛國」。
喺呢場「愛國六指琴魔音樂騷」之中，要夠實力，先至唔會中招。
如果想「港法治港」、「以法治國」，就係全面執行《基本法》條文。不過，按照中國國情，法治係冇可能實現嘅，一向人治兼輸打贏要，所以中方將已經變為骨灰嘅鄧小平、姬鵬飛等陰魂抬出來，將「鄧小平指示」、「姬鵬飛講話」凌駕於《基本法》條文之上，將《基本法》變為「姬本法」；將《中英聯合聲明》變為「鄧小平問米聲明」，再加埋土共霸位，親中舊電池奪權，有如長期飲咗雙氧水，心理唔平衡嘅文盲或半文盲維園阿伯集體發癲，呢一樣，原來就係「胡溫新政」嘅對特區最新政策。
究竟乜嘢先叫做「愛國者」？例如，身為國家領導人嘅霍英東寧願將個孫送去英國牛津讀大學，接受英國帝國殖民教育，都唔送去北京讀北大清華，呢樣又唔知係愛邊一國。董班子連乜嘢叫「中產階級」，都要由「中央政策研究組」「慢慢研究」，需時一年，並在研究之前，學中方咁，搶先定下「中產階級五大原則」，包括唔可以打麻雀，睇書唔可以睇食療湯水美容篇，一定要睇政治分析性書籍如馬克思、阿當屎密夫同埋托洛斯基著作等等。咁究竟乜嘢叫「愛國者」，廢董係咪應該成立一個「愛國定義諮詢委員會」，由佢自己做主席，諮詢研究番三五年，再向佢嘅中央提交「研究報告」？
治港原來以「愛國者為主體」，唔係以「有辦事能力者為主體」，唔怪得特區六年幾，淨係見到廢董帶埋一班人唔係出席升旗禮，把口念念有詞咁默唱《義勇軍進行曲》，搶先申報話自己見到支五星旗好感動、好想喊；就係廢董勞勞碌碌到處去啲土共鄉親團體剪綵、祝酒，講到治港，就一味「國家好，香港好」，由「八萬五」至到賤賣紅灣半島，「愛國」念口簧，治港大隻講，香港呢六年幾，就係俾呢班「以愛國者為主體」嘅假大空動物玩殘搞謝，變為「以愛國者為主體」嘅「主體」嘅中華人民共和國政府嘅一個經濟包袱，屍爬自由行，要十三億人分碗飯佢食，真係現眼報。
𠵱家「愛國」又多了一條定義，唔係事必要打麻雀，睇書要睇番湯水篇，而係「不支持23條立法」，都唔係愛國。
嘩，咁就賤咯。自由黨田北俊發動決定性嘅七七事變，搞到23條立法流產，民建聯曾鈺成轉軚，由支持23條立法，變為要求擱置立法，呢兩名先愛國、後叛國嘅民族叛徒，今日重有一個喺董班子嘅行政會議之中，你話幾咁令親者痛、仇者快？廢董親自擱置立法，當然亦係愛國唔夠堅定。
睇嚟全港最愛國嘅，得番個葉劉淑儀，唔知佢幾時肯由美國回港，參加○七普選？
傳真︰2623-9278
電郵︰