西區福利婦女會前晚喺金鐘名都酒樓搞咗個新春酒會，孫明揚太太鍾小芬都有出席，孫公近排因紅灣半島事件見報率再次高企，當衰禍不單行，早前重超速駕駛被罰三分，孫太話：「佢揸車嗰陣我都在場，佢車細佬去機場嘛，手車係幾快嘅，以前我哋成日揸車入淺水灣拍拖食雪糕。」孫公冇向交警指指個鼻，好似董A1咁問：「你知唔知我係邊個？」都算佢幾尊重法治。
孫太又話近年兩公婆鍾意去灣仔分域街碼頭嘅麥當勞食拍拖餐，貪嗰度有個無敵海景，八方就問孫太，孫公負責中環灣仔呢區嘅填海工程，個海愈填愈窄，到時佢哋拍拖勝地咪冇埋？
孫太即刻話：「我真係要澄清呀，唔係填走晒個碼頭，係拉直條路就真，到時頂多冇咗五分一個海景啫，如果填到冇晒個海景，我同孫生第一個嚴重反對呀。」
（圖）孫太（左）為孫公之前超速駕駛被扣三分講好話。
梁錦雯攝
傳真︰2623-9278
電郵︰