噚日成個晏晝，小初的電話響個不停，皆因好多人好關心新世界發展（017）究竟係唔係供股。小初真係唔明，呢排配股活動雖然頻密，但大部份都反應良好，守得住批股價有餘，點解新世界會選擇供股呢？
經紀黃話，據佢了解，新世界份通告可能冇咁快搞掂，分分鐘今日繼續停牌。
近排接連有批股活動，再加上新世界供股等利淡消息，令小初對後市走勢變得審慎，但經紀陳話，重有唔少人不甘寂寞，想趁個市重有活力出嚟活動。
創業板股份修身堂（8200），噚日公布第三季業績，盈利升幅接近5倍咁多，賺咗成2400萬銀。修身堂上市至今，據講有關人等仍然坐擁大量貨源，如果佢哋唔趁好消息炒番轉，就似乎有多少對唔住自己。
修身堂去年以0.25元招股上市，股價最低都只係見過0.45元，最高就見過0.91元，噚日微跌1.75%，收0.56元。
慕容小初