屯門聚康山莊有四位聚康之星，之前公布第一粒係藝人馬德鐘，另外三位，噚日揭盅，包括兩位體壇健將，風帆好手王合喜同埋武術高手李暉，另一位就係健康飲食專家關嘉美。
三位嘉賓都同健康有關，可以配合物業主題，等物業入伙，佢哋重有機會各展所長，教授各方面健康心得。
首先，王合喜會利用會所泳池，開班授徒，教授風帆知識及同起帆技巧。
著名太極教練李暉，就會喺平台草地開班，教授太極同武術。噚日重同班徒弟即席示範，耍咗套精采嘅太極劍。第日聚康嘅住戶，分分鐘可以變成武林高手。
運動之餘，重照顧埋飲食，關嘉美就會喺住客會所，舉辦健康講座，噚日率先介紹咗兩款健康飲品，同埋專為小朋友而設嘅菜式。
如果真係可以跟晒咁多位專家學嘢，確實係重要嘅養生之道，不過繁忙嘅香港人，唔知有幾多個做得到呢？
禮拜六係情人節，發展商都借勢宣傳。好似長實及新世界，因為傲雲峰與映灣園，喺紅磡國際都會商場有示範單位，就諗出條橋，嗰日喺紅磡火車站連接商場條天橋上面，臨時擺放百二呎長嘅大銀幕，畀啲睇樓人士即時向情人示愛。
佢哋可以透過銀幕，寫啲肉麻嘅調情字句，夠膽重可以親上銀幕，大聲疾呼示愛。
睇樓客又可以參加抽獎，發展商送出一晚紅磡都會海逸酒店雙人住宿連晚餐券，名額六個，總值萬八。針對映灣園參觀者，發展商會送九十九支玫瑰畀佢哋，先到先得，同場又會大派朱古力。
反價封盤變成家常便飯，買家惟有不斷追價，追到業主滿意為止。
屋之島豪宅部經理歐志康話，有二十年樓齡嘅半山麥當勞道蔚山花園，業主上月放盤，叫價千四萬，好快就有四五個客畀到價，佢即刻反價，就算買家一路追價到一千四百五十萬，都唔肯賣。過完農曆年，再反到千五萬。最後其中一個買家出多十五萬，到一千五百一十五萬先至買到。
單位係二十四樓二一九五呎，三房連露台，豪裝，呎價六千九。業主係中資公司，原本畀老闆住，後嚟遷出。
物業舊年第四季曾經放租，但見市況好，轉為出售，十八年勁賺近千三萬。
聽講，新買家遲啲可能會放售，估計每呎叫價有機會喺八千樓上。
樓價好似海鮮價，買家為咗買到心頭好，要出盡法寶。
世紀21馬鞍山分行經理譚兆濤話，一名換樓客，睇中海典灣單位，咁啱業主去咗內地做嘢，要一段時間至回港，擔心到時價錢有變，所以該行應客戶要求，即晚送定上珠海。
個單位係三座高層C，一○四七呎，全海景，成交價三百四十五萬，係市價。
譚兆濤話，個客睇咗兩三日樓，只係睇海典灣與聽濤雅苑，睇咗十幾個，最後覺得呢個最適合。
買家手上單位稍後放售。近排啲換樓客，唔擔心手上單位賣唔出，一般都係用先買後賣。
恒隆集團噚晚招待滙豐銀行貴賓，參觀尖沙嘴君臨天下，共有一百枱客。聽講，個個有逾五百萬存款。
不過，噚晚淨係畀睇唔畀買。今晚會喺會所搞藝術展，恒隆集團主席陳啟宗，同埋賣樓話事人吳士元當然會出席。
個盤早排秘密預留，有四十幾伙，最快下周一簽買賣文件。噚晚市傳二座六十樓B，一三七九呎，連車位，二手每呎叫價萬一放售。個盤都未正式賣，業主就已急不及待要放盤。
君臨天下以維港海景做賣點，聞說，發展商想先賣中高層海景單位，最低消費呎價一萬蚊，園景就八千蚊。
蘭西
電郵地址：
