新世界發展（017）又伸手，之前「披成」試盤反應麻麻，會否退而思其次，變成供股呢？不過，市勢並冇受影響，噚日午後行情雖較為波動，但恒指收市仍升百點。
港股暫時重係橫行整固，在上月27日高位13781同10日線（13304）間上落，捱時間，但相信唔會拖得太耐，最遲下禮拜，市勢就會有較明朗發展，若向上升破前高位阻力，恒指可向14500至15000區域推進。除國企外，資產股預期亦會再起升浪，例如早前推介過的大酒店（045）同滙漢控股（214），都可留意，前者大行目標價係6.5元，後者以突破大圓底的量度升幅計，最少可見4.2元。
樓市好咗幾個月，唔單止樓價回升幾成，銷路亦轉暢，地產公司受惠良多，富豪酒店（078）亦脫胎換骨，由債股搖身一變成為高資產股，公司旗下豪宅皇牌富豪海灣的呎價由最初的8000元，調升到近日的意向呎價12500元，升幅超過5成。
富豪海灣第一二期共有單位139個，現時售出60個，套現22億元，若以平均呎價一萬元計，全部售罄可套現70多億元，富豪佔7成權益，可攤佔50億元，而集團早年為此項目進行的23億元撥備，亦可以全部回撥。
23億元對富豪而言，係一個絕大的數目。富豪發行股數71億股，以現價0.211元計，市值僅15億元，23億元在04年度（12月年結）全數入帳，1年的非經常收入已相等市值1.5倍，每股已值0.32元，重未計其他業務嘅收入。經配股調整後，03年底每股資產淨值0.48元，加上回撥及旗下酒店升值之數，每股淨值0.9元算係保守估計，就算折讓6成，股價已可見0.36元，預期升幅有70%！
05年，富豪盈利仍好理想。位於鴨脷洲的發展項目，興建1300個住宅單位，樓面約90萬方呎，計劃05年推出市場，全部售罄可套現60億元，富豪佔3成權益可攤佔18億元，獲利約3億元；另外，酒店業務預計獲利3億元，加上其他售樓及租金收益，估計全年盈利可達7億元，每股盈利0.1元，PE都只係2.1倍！
郭兆誠