東亞（023）業績靚，銀行股成為大市動力，資金噚日主力追捧銀行股，大笨象滙豐（005）升1.5元，收126元，帶動港股升100點，恒指以13625收市。地產股剛被大摩唱淡，滙豐大班艾爾敦又警告樓價急升會形成危機，加上噚日新世界（017）供股抽水，令地產股無力再上，出現沽壓。
阿虎一直以為信置（083）會是今次升浪中第一隻抽水的大地產股，點知畀新世界先跑出。早前市場曾經傳過新世界升至9-10元才會配股，近日股價已在9元附近徘徊，噚日朝傳出配股消息，即刻跌至8.70元，公司亦跟住停牌。但更令人意外是，新世界據講今次係供股而非配股，4供1，每股供6.70元，集資逾41億元。
黑客話唔算意外，因為周大福持股量約35%，若只係配股，持股量或攤薄至低於30%，彤叔本身又唔係冇錢，若有其他股東唔供股，佢重可以低價增持，何樂而不為？
新世界已有動作，信置又會點呢？ｉ師傅話，信置過往配股，接貨者幾乎次次都要輸錢，好多人已經怕怕，相信唔太多人關心信置配股消息。但凡配股，一定要畀些少水位承配人走貨賺錢，同埋售後服務要周到，否則日後好難再搵人捧場。
黃玉郎旗下玉皇朝飲食（970）話有意收購大股東漫畫業務。黃玉郎一生傳奇，唔使阿虎多講，雖然阿虎一直係龍虎門長期讀者，不過現時漫畫市場競爭激烈，而漫畫文化又會隨着時間不斷轉變，究意呢門生意有幾吸引，阿虎唔識睇，但據聞將有不少「文化界」友好捧場。
阿 虎