由占基利（JimCarrey）主演嘅電影，票房一向有番咁上下，但係就成日俾人話佢，拍啲戲一味搞笑冇乜內容。最近占爺就拍咗套比較偏鋒嘅愛情喜劇，可能係希望觀眾睇完之後會對佢改觀。
呢套《EternalSunshineoftheSpotlessMind》除咗有占爺壓陣之外，重有至受英國人愛戴嘅琦溫絲莉（KateWinslet）、青春偶像伊利亞活（ElijahWood）同姬絲頓丹絲（KirstenDunst），再加上英國老戲骨湯衞堅遜（TomWilkinson），陣容相當鼎盛。
叫得做偏鋒作品，主要係因為呢齣戲個編劇，就係撰寫過《玩謝麥高維治》同《何必偏偏玩謝我》嘅鬼才編劇查理卡夫曼（CharlieKaufman），呢位仁兄之前嘅作品詭異得嚟又令人拍案叫絕，今次部戲亦唔例外。
部戲其實係講占爺同肥溫係情侶，但係因為感情變淡，肥溫就搵湯衞堅遜飾演嘅精神科醫生用新技術，清除晒有關佢同男友嘅記憶，事後占爺嬲起上嚟亦搵醫生做同樣嘅手術，但做做吓手術時，佢又發覺自己並唔想忘記愛人，重設法要將女友帶入佢一段段嘅記憶之中。