因為個個星期六日晚上都睇有線直播英超聯，睇睇吓就下注賭波，求過癮刺激，因為每次下注少過一百蚊，輸咗都唔肉痛。上個禮拜足總盃曼城對熱刺、布力般流浪對米杜士堡，左丁山都因為睇賠率而買（主客和）曼城贏、布力般贏，果然中晒，可惜只係贏幾十蚊啫，如果每次投注一萬，豈非肥仔？
呢兩場都有直播，朝早起床睇電視，先知道打得咁刺激，如果現場睇，好可能有心臟病。曼城上半場輸三球，跟住一人趕出場，下半場以寡敵眾，竟然可以連入四球？編劇都話你黐線，但結果竟然如此，買熱刺贏波嘅老友，幾十年後仍然覺得唔抵。
曼城領隊奇雲基瑾話：「我死後幾十年，電視台仍會重播呢場波！」呢個世界有啲人賭錢吵到冇得頂。一個蘇格蘭球迷喺曼城?熱刺上半場打完之後，見WilliamHill開盤，曼城贏波賠率一賠二百五十，於是下注一百鎊買曼城，咁就贏咗WilliamHill二萬五千鎊。唔好以為WilliamHill輸到直喎，因為一位熱刺死硬派擁躉一路買熱刺贏，下半場戰果三比一（熱刺領先）之時，以二十五賠一嘅賠率，下注一萬鎊，打到三比二，熱刺贏波賠率變為四賠十一，加碼八千鎊。結果？梗係清袋喇，幫補番WilliamHill。所以賭波係小注怡情好嘞，或者係刀仔鋸大樹，一百贏二萬五，不斷加碼嘅話，好容易破產！