香港科技園行政總裁譚宗定（圖）上任近一年，其間不斷往海外為香港拉客，搬入旗下嘅科學園、工業邨，噚日佢同八方講，外商對工業邨係乜東東都唔知，結果佢要用番摩托羅拉前亞太區總裁名義，先至獲外商頭頭接見。佢又話入主後，一啲老臣子嘈做乜搞咁多嘢，結果要同佢哋思想再教育，清楚明確定下各人嘅工作指標，達唔到指標嘅就要拜拜。
譚宗定對於環境十分重視，佢話會將新加入大埔工業邨客戶嘅廠房，四周用樹木代替石屎牆作為分隔。呢個意念係佢喺大埔摩托羅拉廠時已採用。講起呢件事，佢重講咗個笑話，話說當時摩記廠一邊嘅樹長得特別粗壯，了解後原來喺的士司機「方便」嘅傑作，結果佢請咗外籍保安員，手持大閃光燈相機巡邏，一發現有可疑人物就用大閃燈同佢哋影相，呢班「方便客」至自動消失。佢重有一個美化環境嘅構想，就係喺科學園第二期搞海濱長廊，等市民情侶假日多個好去處。
傳真︰2623-9278
電郵︰