向來備受車迷注目嘅瑞士日內瓦車展，快將於下月初舉行，各大車廠屆時將會展出旗下最新車款及概念車，勢必令在場車迷有目不暇給之感；就好似來自日本嘅萬事得及德國歐寶汽車咁，佢哋就會響場內分別展出MX-Flexa及Trixx，同樣係吸引度十足㗎！
雖然萬事得MX-Flexa概念車，廠方暫時只公布咗此車嘅概念草圖，並未有任何真實嘅相片畀車迷觀賞；但從圖中可以睇到，以六座位及闊大車廂空間設計為主嘅MX-Flexa，外形設計與早前曾在北美國際車展上展出嘅MX-MicroSport概念車相近，同樣來得跑味十足富活力感，而車廂空間及機械配搭，亦會予人一新耳目之感。
至於歐寶Trixx概念車，就要來得更具吸引力，除咗佢嗰個以鮮黃色示人嘅車身色調惹人注目外，車子本身嘅尺碼亦僅為3040×1660×1570mm，望落可謂小巧又別致；但話雖如此，車廂空間卻要來得寬敞闊落，不但令擺放行李嘅空間變得充裕外，匹配活像豪華旅遊巴士嘅後排座椅，從而令車上乘客可擁有舒適嘅乘坐感。至於引擎配搭方面，廠方為其安排咗一台，沿用於Corsa嘅1.3公升CTDI柴油Turbo引擎作核心，馬力輸出達70匹，用以驅動此車可謂綽綽有餘。
若你想知道更多關於呢兩部車，又或者係今屆日內瓦車展更多嘅資料的話，咁就不妨留意我哋稍後嘅報道喇！
